قازاقستاندىق ارتيللەريستەردىڭ، اسكەري توپوگرافتار مەن اتقىشتاردىڭ حالىقارالىق ارميا ويىندارى بايقاۋلارىنداعى سەنىمدى جەڭىستەرىنەن كەيىن قازاقستاننىڭ تاعى ءتورت كومانداسى ارمەنيا، ازەربايجان جانە رەسەيدەگى جارىس الاڭدارىندا ونەر كورسەتۋىن جالعاستىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
ديليجاندا (ارمەنيا) ءوتىپ جاتقان «الەم جاۋىنگەرى» بايقاۋىنىڭ «راتنيك» كەزەڭىندە قازاقستاندىق كوماندا ەرلەر اراسىنداعى اسكەري-قولدانبالى كەشەندە جەڭىسكە جەتتى. ەكىنشى ورىندا – بەلارۋس، ءۇشىنشى ورىندا – رەسەي كوماندالارى. دۇيسەنبىدە اتىس جاتتىعۋلارىنان، اسكەري-مەديسينالىق جانە اسكەري-قولدانبالى كەشەندەردەن تۇراتىن كەزەڭنىڭ سوڭعى ناتيجەلەرى شىعارىلادى.
كاباردينو-بالكاريادا «تەرسكول» تاۋ دايىندىعى وقۋ ورتالىعىندا «ەلبرۋس ساقيناسى» كونكۋرسىندا كوشباسشىلىق ءۇشىن تاباندى كۇرەس جالعاسىپ جاتىر. ءبىر كۇن بۇرىن اسكەري الپينيستەر توعىزىنشى ارنايى تاپسىرمانى ورىندادى. جارتاس ۋچاسكەسىنەن ءوتۋ جارىسىندا قازاقستان كومانداسى ءۇشىنشى ناتيجە كورسەتتى. ءبىرىنشى ورىندا – رەسەي كومانداسى، ەكىنشى ورىندا – وزبەكستان.
بۇگىن بايقاۋعا قاتىسۋشىلار يريك شاتقالىنان (2 800 م) كىشى ازاۋ مۇزدىعىنا (3 264 م) 25 شاقىرىمدىق جاياۋ مارش جاسايدى. دۇيسەنبى كۇنى بايقاۋعا قاتىسۋشىلار مۇز ۋچاسكەسىندە كوتەرىلۋ/ءتۇسۋ جانە زارداپ شەگۋشىنى تاسىمالداۋعا ارنالعان ارنايى تاپسىرمالاردى ورىندايدى.
ماسكەۋ تۇبىندەگى «الابينو» پوليگونىندا قازاقستان كومانداسىنىڭ تانكيستەرى «تانك بياتلونى» جارتىلاي فينالدىق ەستافەتاسىنىڭ وتەتىن كۇنى مەن قارسىلاستارىن انىقتايتىن جەرەبە تارتۋدى كۇتىپ وتىر. ازەربايجانداعى «تەڭىز كۋبوگى» بايقاۋىندا 22 تامىزدا قاتىسۋشىلار جاۋىنگەرلىك جۇزۋشىلەر شەبەرلىگىندە ب ا ق سىنايدى.