Global Firepower ۇيىمى 2025 جىلعا ارنالعان اسكەري قۋات رەيتينگىنىڭ جاڭارتىلعان نۇسقاسىن ۇسىندى. بۇل تىزىمدە قازاقستان ءوزىنىڭ پوزيسياسىن نىعايتىپ، 57-ورىنعا كوتەرىلدى. ال 2024 جىلى الەمدىك ارميالار رەيتينگىندە 58-ورىندا بولعان ەدى.
ورتالىق ازيا كورشىلەرىنىڭ ىشىندە قازاقستانعا ەڭ جاقىن ورنالاسقان وزبەكستان 58-ورىندا. باسقا ەلدەردىڭ ناتيجەلەرى كەلەسىدەي: تۇرىكمەنستان – 77-ورىن، قىرعىزستان – 105-ورىن، تاجىكستان – 108-ورىن.
جەكەلەگەن كورسەتكىشتەر بويىنشا دا قازاقستان ايتارلىقتاي ناتيجەلەرگە جەتتى:
- رەاكتيۆتى زالپتىق وت جۇيەلەرىنىڭ سانى بويىنشا 17-ورىن (407 بىرلىك).
- ءوزى جۇرەتىن ارتيللەريا سانى بويىنشا 21-ورىن.
رەيتينگتىڭ ءبىرىنشى ورنىندا بۇرىنعىداي اقش تۇر، ەكىنشى ورىندا – رەسەي، ۇشىنشىدە – جۇڭگو. ءتىزىمنىڭ العاشقى بەستىگىنە ءۇندىستان مەن وڭتۇستىك كورەيا كىرگەن. ال ەڭ سوڭعى ورىندا بۋتان ورنالاسقان.
Global Firepower رەيتينگى بىرنەشە جىلدان بەرى جاريالانىپ كەلەدى. زەرتتەۋشىلەر الەمنىڭ 145 ەلىنىڭ ارميالارىن 50-دەن استام پارامەتر بويىنشا ساراپتايدى. وعان ارميا مەن باسقا دا اسكەري قۇرىلىمداردىڭ سانى، ولاردىڭ قارجىلاندىرىلۋى، ەلدەردىڭ گەوگرافيالىق جاعدايى كىرەدى. دەگەنمەن، نەگىزگى نازار اسكەري الەۋەتكە اۋدارىلادى: قارۋ-جاراقتىڭ تۇرلەرى، اسكەر سانى، رەزەرۆيستەر جانە ت.ب.
2023 جىلى قازاقستان ارمياسى رەيتينگتە بىردەن بەس ورىنعا كوتەرىلىپ، 63-ورىننان 58-ورىنعا شىققان ەدى. ەكونوميست جانە قوعام قايراتكەرى ايدار الىبايەۆتىڭ ايتۋىنشا، قازاقستان ارمياسىنىڭ Global Firepower تىزىمىندە جوعارىلاۋى ەلدىڭ اسكەري الەۋەتىن ارتتىرۋعا باعىتتالعان جۇمىستاردىڭ ناتيجەسى.