اۋە قورعانىسى كۇشتەرىن باسقارۋدىڭ اۆتوماتتاندىرىلعان جۇيەسى پايدالانىلادى
قازاقستاندا «ايبالتا-2022» جەدەل-ستراتەگيالىق وقۋ-جاتتىعۋى شەڭبەرىندە «اشىق اسپان-2022» جەدەل-تاكتيكالىق كوماندالىق-شتابتىق وقۋ-جاتتىعۋى باستالدى. بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى Almaty-akshamy.kz.
وقۋ-جاتتىعۋعا 40-تان استام مايداندىق، ارميالىق جانە اسكەري-كولىكتىك اۆياسيا، پيلوتسىز ۇشۋ اپپاراتتارى، سونداي-اق اۋە شابۋىلىنا قارسى قورعانىس اسكەرلەرىنىڭ كۇشتەرى مەن قۇرالدارى جۇمىلدىرىلعان. ءىس-قيمىلدارعا اۋە قورعانىسى كۇشتەرىنىڭ باس قولباسشىسى اۆياسيا گەنەرال-لەيتەنانتى نۇرلان ورمانبەتوۆ باسشىلىق ەتۋدە.
ءمالىم ەتىلگەندەي، جاتتىعۋلار ەلىمىزدىڭ بارلىق وڭىرىندە وتەدى. ماقسات – قارسىلاس اۋە شابۋىلى قۇرالدارىن قولدانعان كەزدە جەكە قۇرامدى پراكتيكالىق ءىس-قيمىلدارعا ۇيرەتۋ.
«قازىرگى تاڭدا اسكەري-اۋە كۇشتەرى مەن اۋە شابۋىلىنا قارسى قورعانىس اسكەرلەرىنىڭ باسقارۋ ورگاندارى، قۇرامالارى مەن بولىمدەرى جاۋىنگەرلىك ازىرلىككە كەلتىرىلىپ، وقۋ-جاۋىنگەرلىك قيمىلداردى ۇيىمداستىرۋ شارالارىن جۇرگىزۋدە. كەلەسى كەزەڭدەردە اۆياسيانىڭ پراكتيكالىق ۇشۋلارىمەن قۇرامالار مەن بولىمدەردى جاۋىنگەرلىك مىندەتتەردى ورىنداۋعا دايىنداۋ ۇيىمداستىرىلاتىن بولادى. سونداي-اق اۋە قورعانىسى كۇشتەرىن باسقارۋدىڭ اۆتوماتتاندىرىلعان جۇيەسىن پايدالانا وتىرىپ، شارتتى اۋە نىساندارىن ۇستاپ، ولاردى جويۋ جۇزەگە اسىرىلادى»، - دەلىنگەن مينيسترلىك حابارلاماسىندا.
بۇدان وزگە، قازاقستاندىق اسكەريلەر ۇقشۇ-نىڭ ۇجىمدىق جەدەل دەن قويۋ كۇشتەرىنىڭ «ىزدەستىرۋ-2022»، «ەشەلون-2022» جانە «ءوزارا ءىس-قيمىل-2022» وقۋ-جاتتىعۋلارىنا تارتىلاتىن بولادى. وقۋ-جاتتىعۋلار 7 قازانعا دەيىن جالعاسادى.