2024 جىلدان باستاپ حالىقارالىق ارالدى قۇتقارۋ قورىنا ءتوراعالىق ەتۋ كەزەگى قازاقستان رەسپۋبليكاسىنا ءوتتى.
الداعى ءۇش جىل بويى ەلىمىز اتالعان ۇيىمدى باسقاراتىن بولادى، دەپ حابارلايدى Almaty-akshamy.kz Cۋ رەسۋرستارى جانە يرريگاسيا مينيسترلىگىنە سىلتەمە جاساپ.
مەملەكەت باسشىسى قاسىم-جومارت توقايەۆ 2026 جىلدىڭ سوڭىنا دەيىن حاقق پرەزيدەنتى بولىپ سايلاندى.
قۇرامىنا قازاقستان، تاجىكستان، تۇرىكمەنستان جانە وزبەكستان كىرەتىن حالىقارالىق ارالدى قۇتقارۋ قورى ارال تەڭىزىن قۇتقارۋعا جانە ءوڭىردىڭ ەكولوگيالىق جاعدايىن جاقسارتۋعا، سونداي-اق جالپى الەۋمەتتىك-ەكولوگيالىق پروبلەمالاردى شەشۋگە باعىتتالعان بىرلەسكەن مەملەكەتارالىق ەكولوگيالىق جانە عىلىمي-پراكتيكالىق باعدارلامالار مەن جوبالاردى ىسكە اسىرۋمەن اينالىسادى.
«ءبىز ورتالىق ازيا مەملەكەتتەرىمەن، سونداي-اق باسقا دا حالىقارالىق ۇيىمدارمەن جانە قارجى ينستيتۋتتارىمەن ىنتىماقتاستىقتى ارتتىرۋدى جوسپارلاپ وتىرمىز. بيىل ءبىز دۇنيەجۇزىلىك بانكپەن بىرگە جۇزەگە اسىرىلىپ جاتقان سولتۇستىك ارالدى ساقتاۋ جوباسىنىڭ ەكىنشى كەزەڭىن باستاۋدى جوسپارلاپ وتىرمىز. ارال تەڭىزىن قۇتقارۋ - بۇل حاقق-عا قاتىسۋشى بارلىق ەلدەردىڭ بىرلەسكەن كۇش-جىگەرىنىڭ ارقاسىندا عانا ورىندالاتىن مىندەت. الداعى ءۇش جىلدا ءبىز وسى باعىتتا ماڭىزدى ناتيجەلەرگە قول جەتكىزۋگە نيەتتىمىز»، - دەدى ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.