ءقازىر باتىس ساحارادا 6، ليۆانداعى ۋاقىتشا كۇشتەردە 9 اسكەري قىزمەتشى قىزمەت اتقارىپ ءجۇر.
پارلامەنت پرەزيدەنت قاسىم-جومارت توقايەۆتىڭ 430 اسكەري قىزمەتشىنى بۇۇ-نىڭ بىتىمگەرلىك ميسسيالارىنا جىبەرۋ تۋرالى ۇسىنىسىن قولدادى، دەپ حابارلايدى Almaty-akshamy.kz
پارلامەنتتىڭ بىرلەسكەن وتىرىسىندا مەملەكەت باسشىسىنىڭ قازاقستاندىق اسكەريلەردى بىتىمگەرلىك ميسسيالارعا جىبەرۋ تۋرالى ۇسىنىسى قارالدى. پرەزيدەنتتىڭ ۇسىنىسىن قورعانىس ءمينيسترى رۋسلان جاقسىلىقوۆ وقىپ بەردى.
ايتۋىنشا، قازىرگى ۋاقىتقا دەيىن قارۋلى كۇشتەردىڭ اسكەري قىزمەتشىلەرى، پارلامەنت قاۋلىلارىنا سايكەس، بەيبىتشىلىك پەن قاۋىپسىزدىكتى قولداۋ جونىندەگى حالىقارالىق مىندەتتەمەنى ورىنداۋ ءۇشىن بۇۇ بىتىمگەرشىلىك ميسسيالارىنا جىبەرىلىپ وتىردى. ءقازىر باتىس ساحارادا 6، ليۆانداعى ۋاقىتشا كۇشتەردە 9 اسكەري قىزمەتشى قىزمەت وتكەرىپ جاتىر.
«وڭىردە جانە الەمدە بولىپ جاتقان سوڭعى وقيعالار قاۋىپسىزدىككە تونەتىن سىن-قاتەردى جوققا شىعارمايدى. وسىعان بايلانىستى اسكەردىڭ جاۋىنگەرلىك ازىرلىگىن ودان ءارى نىعايتۋ، قازىرگى سىن-قاتەرگە قارسى ارەكەت ەتۋدە تاجىريبە جيناقتاۋ ماسەلەسى وزەكتى بولىپ وتىر. وسى تۇرعىدا، ۇيىم جارعىسىنىڭ جەتىنشى تاراۋىنا سايكەس، قارۋلى كۇشتەردىڭ ورتالىق افريكادا، كونگو دەموكراتيالىق رەسپۋبليكاسىندا، ماليدە بىتىمگەرشىلىك ميسسياعا قاتىسۋىن كەڭەيتۋدى ورىندى دەپ سانايمىن»، - دەلىنگەن پرەزيدەنتتىڭ ۇسىنىسىندا.
قازاقستان شتاب وفيسەرى، اسكەري بايقاۋشى رەتىندە قازىرگى ۋاقىتتا ميسسيادا اناعۇرلىم تاپشى بولىپ تابىلاتىن جاياۋ اسكەر، مەديسينالىق، بارلاۋ، ينجەنەرلىك، اسكەري پوليسيا بولىمشەسىن بولۋگە دايىن. بۇل تاجىريبە اسكەرىمىزدىڭ جاۋىنگەرلىك دايارلىعىن جەتىلدىرۋ، ولاردى ودان ءارى دامىتۋ بويىنشا ۇسىنىس دايىنداۋ ءۇشىن قولدانىلادى.
وسىنىڭ نەگىزىندە، كونستيتۋسيانىڭ 53-بابىنا سايكەس، بىتىمگەرشىلىك كونتينگەنت - جالپى سانى 430 اسكەري قىزمەتشىنى:
ورتالىق افريكاداعى تۇراقتاندىرۋ جونىندەگى ميسسياعا؛
كونگو دەموكراتيالىق رەسپۋبليكاسىنداعى تۇراقتاندىرۋ جونىندەگى ميسسياعا؛
ماليدەگى تۇراقتاندىرۋ جونىندەگى ميسسياعا؛
«ليۆانداعى ۋاقىتشا كۇشتەر» ميسسياسىنا جىبەرۋ تۋرالى ۇسىنىس ەنگىزىلدى.
پارلامەنت دەپۋتاتتارى قاسىم-جومارت توقايەۆتىڭ ۇسىنىسىن قولدادى.
ايتا كەتەرى، 2014 جىلدان باستاپ 45 وفيسەر باتىس ساحاراداعى، كوت-د’يۆۋارداعى، ليۆانداعى ميسسياعا اسكەري بايقاۋشى جانە شتاب وفيسەرى رەتىندە، 2018 جىلدان باستاپ 520 اسكەري قىزمەتشى بىتىمگەرشىلىك بولىمشە قۇرامىندا «ليۆانداعى ۋاقىتشا كۇشتەر» ميسسياسىنا قاتىستى.