قازاقستانعا اەس نە ءۇشىن كەرەك؟ ونىڭ قانداي ءتيىمدى تۇستارى بار؟
قازاقستاننىڭ BAYTAQ جاسىلدار پارتياسىنىڭ ءتوراعاسى ازاماتحان ءامىرتايدىڭ ايتۋىنشا، زاماناۋي اتوم ەلەكتر ستانسيالارى (اەس) ءقاۋىپسىز ءارى قولايلى ەنەرگيا كوزى بولىپ تابىلادى. بۇل تۋرالى ول قوعامعا ارناپ جاساعان ۇندەۋىندە ايتتى، دەپ حابارلايدى aqshamnews.kz
اەس سالۋ تاقىرىبىنا قاتىستى قوعامدىق تالقىلاۋ بۇگىن اياقتالدى. بۇل ماسەلە قوعامدا قىزۋ پىكىرتالاس تۋدىرىپ، پىكىرلەر ەكىگە ءبولىندى. ا. ءامىرتايدىڭ پىكىرىنشە، قازىرگى تاڭدا قولدانىلىپ جۇرگەن كومىر ەنەرگياسى ەكولوگياعا كەرى اسەرىن تيگىزۋدە. ول قازاقستاننىڭ ەكولوگيالىق تازا ءوندىرىس پەن قورشاعان ورتانى قورعاۋ ماقساتىندا اەس سالۋدىڭ ماڭىزدىلىعىن اتاپ ءوتتى.
"ءبىزدىڭ ماقساتىمىز – ەلىمىزدە تازا اۋا مەن تازا سۋدى قامتاماسىز ەتۋ، ەكولوگيالىق تازا ءوندىرىستى قالىپتاستىرۋ. الەمدە تازا، جاسىل ەنەرگيا كوزى رەتىندە اتوم ەنەرگياسى تانىلعان. دامىعان ەلدەر بۇعان الدەقاشان كوز جەتكىزگەن. سەبەبى كليماتتى تۇراقتى ۇستاپ قالۋ جانە قورشاعان ورتانى قورعاۋ ماسەلەسىن تەك اتوم ەلەكتر ستانسياسى ارقىلى قامتاماسىز ەتۋگە بولادى،" - دەدى ازاماتحان ءامىرتاي.
بۇل پىكىرلەر قازاقستاندا اەس سالۋ ماسەلەسىن قايتادان كۇن تارتىبىنە شىعاردى. ءامىرتايدىڭ ايتۋىنشا، ەلدىڭ ەنەرگەتيكالىق بولاشاعىن قامتاماسىز ەتۋ ءۇشىن اەس سالۋ قاجەتتى جانە ورىندى شەشىم بولىپ تابىلادى.