«قازاقكونسەرت» ارتىستەرى شانحاي ىنتىماقتاستىق ۇيىمىنىڭ 20-شى مەرەيتويلىق ءسامميتىنىڭ گالا-كونسەرتىندە ونەر كورسەتتى، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
تاجىكستان، وزبەكستان، پاكىستان، قىرعىزستان، رەسەي، جۇڭگو جانە ءۇندىستان وكىلدەرى باس قوسقان بۇل ءىس-شارادا وتاندىق ارتىستەر قازاق مادەنيەتىن جوعارى دارەجەدە كورسەتە ءبىلدى.
«ۇلتتىق ءان ونەرىنىڭ ۇزدىك ۇلگىلەرىن "قازاقكونسەرت" ءسوليسى، قازاقستاننىڭ ەڭبەك سىڭىرگەن قايراتكەرى ەرلان رىسقالي ۇسىندى. ءانشى بەلگىلى كومپوزيتور باۋىرجان اقتايەۆتىڭ وڭدەۋىندەگى «مولدابايدىڭ ءانى» تۋىندىسىن ورىندادى. ب.اقتايەۆتىڭ كوركەمدىك جەتەكشىلىگىمەن ونەر كورسەتەتىن «استانا سازى» فولكلورلىق ءانسامبلى دە ونىڭ «ارناۋ» مۋزىكالىق شىعارماسىن ورىنداپ، جينالعان قاۋىمدى ءتانتى ەتتى. ۇلى دالا ەلىنىڭ مادەني بولمىسىن جەتكىزە بىلگەن بۇل تۋىندى كوپشىلىكتىڭ زور ىقىلاسىنا بولەندى. سونداي-اق شەتەلدىك كورەرمەندەر «سالتانات» مەملەكەتتىك بي ءانسامبلىنىڭ ورىنداۋىنداعى بي كومپوزيسيالارىن تاماشالاي الدى»، - دەپ اتاپ وتەدى "قازاقكونسەرت" باسپا ءسوز قىزمەتىنەن.
"قازاقكونسەرت" ارتىستەرى ءوز ونەرى ارقىلى شىۇ-نا مۇشە ەلدەردىڭ اراسىنداعى ىنتىماقتاستىق جانە دوستىق قارىم-قاتىناستىڭ نىعايۋىنا ءوز ۇلەسىن قوستى. شانحاي ىنتىماقتاستىق ۇيىمىنىڭ ءسامميتى اياسىندا وتاندىق ارتىستەر ەندى 18 قىركۇيەك كۇنى تاجىكستاننىڭ بوحتار قالاسىندا وتەتىن ۇلكەن كونسەرتتە ونەر كورسەتپەك.