شاكەن ايمانوۆ اتىنداعى «قازاقفيلم» كينوستۋدياسى الماتى قالاسىنداعى رىسقۇلوۆ داڭعىلى، 101ب مەكەنجايىندا ورنالاسقان جەر تەلىمى مەن بۇرىنعى «قازكينوپروكات» عيماراتىنىڭ ساتىلعانى تۋرالى قاۋەسەتتەردى جوققا شىعاردى، دەپ حابارلايدى aqshamnews.kz.
كينوستۋديانىڭ وكىلدەرى Facebook پاراقشاسىندا بۇل جەر تەلىمى مەن عيماراتتىڭ ءالى دە ستۋديانىڭ مەنشىگىندە ەكەنىن جانە ساتۋعا جاتپايتىنىن مالىمدەدى.
كينوستۋديانىڭ مالىمەتىنشە، كورسەتىلگەن اۋماقتاعى عيمارات اپاتتى دەپ تانىلعان. قاۋىپسىزدىكتى قامتاماسىز ەتۋ ماقساتىندا «قازاقفيلم» الماتى قالاسى اكىمدىگى وكىلدەرىنىڭ قاتىسۋىمەن كەشەندى ساراپتاما ۇيىمداستىرعان.
«مامانداردىڭ قورىتىندىسى نەگىزىندە بۇل عيماراتتى ءقاۋىپسىز پايدالانۋ بويىنشا ودان ءارى شەشىمدەر قابىلدانادى. جەر تەلىمى مەن عيمارات كەشەنى ساتىلدى دەگەن اقپارات جالعان. بۇل جالعان اقپاراتتى تاراتۋدى جالعاسا بەرسە، سوتقا جۇگىنۋ قۇقىعىمىزدى ساقتايمىز»، — دەلىنگەن كينوستۋديا مالىمدەمەسىندە.
سونىمەن قاتار، «قازاقفيلم»وتكىزۋ رەجيمىنىڭ قاتاڭداۋى تۋرالى اقپاراتتى جوققا شىعاردى. قولدانىستاعى وتكىزۋ جۇيەسى قىزمەتكەرلەردىڭ قاۋىپسىزدىگىن قامتاماسىز ەتۋگە جانە ستۋديا مۇلكىنىڭ ساقتالۋىنا باعىتتالعان. بۇل الەمدەگى بارلىق كينوستۋديالاردا ستاندارتتى تاجىريبە.
«مۇنداي شارالار كينوستۋديالاردا كەڭىنەن قابىلدانعان تاجىريبە جانە ۇرلىق، ءورت جانە باسقا دا وقيعالاردىڭ الدىن الۋ ءۇشىن قاجەت»، — دەلىنگەن حابارلامادا.