مادەنيەت جانە اقپارات ءمينيسترى ايدا بالايەۆا "قازاقفيلم" كينوستۋدياسىنا قاتىستى سۇراقتارعا جاۋاپ بەردى، دەپ حابارلايدى aqshamnews.kz
«قازاقفيلمگە» قاراستى جەردىڭ ساتىلۋى جايىندا؟
"بۇل ماسەلە توڭىرەگىندەگى نەگىزسىز قاۋەسەت ءبىرجولا توقتاتىلۋى ءتيىس. «قازاقفيلمگە» تيەسىلى جەرلەر كينوستۋديا يەلىگىندە قالا بەرەدى. جەر ساتىلعان جوق جانە تەك كينەماتوگرافيا مۇددەسى ءۇشىن پايدالانىلۋدا"، دەدى مينيستر.
كينوستۋديانى جوندەۋگە ينۆەستورلار قوماقتى قارجى سالۋعا دايىن با؟
"بۇل اقپارات قوعامدا كەڭ تاراپ ءجۇر، الايدا مۇنداي مالىمدەمەلەردى قۇجاتتارمەن نەمەسە ناقتى كەپىلدىكتەرمەن راستاي المايتىن ادامدار جاساپ وتىر. مەملەكەت، ياعني مادەنيەت جانە اقپارات مينيسترلىگى ناقتى ينۆەستورلارمەن جۇمىس ىستەۋگە دايىن. دەگەنمەن ازىرگە ەشقانداي ناقتى ۇسىنىس، بىردە-بىر كەپىلدىك حاتى جوق. بارلىعى تەك اڭگىمە دەڭگەيىندە"، دەپ ءتۇسىندىردى ايدا بالايەۆا.
"قازاقفيلم" ەلورداعا كوشە مە؟
"بۇل دا ەشقانداي نەگىزى جوق قاۋەسەت. قازىرگى ۋاقىتتا ەلورداعا «قازاقانيماسيا» شىعارماشىلىق بىرلەستىگىن كوشىرۋ مۇمكىندىگى قاراستىرىلىپ جاتىر. مۇندا ماڭىزدى جايت – «قازاقانيماسيا» وندىرىستىك بازا ەمەس، انيماسيالىق كونتەنت جاساۋعا تاپسىرىستاردى بولەتىن قۇرىلىم. سوندىقتان ونىڭ استاناعا كوشۋى سالانىڭ جۇمىسىنا ەش كەدەرگى كەلتىرمەيدى"، دەدى بالايەۆا.
مينيستر كەيىنگى بەس جىلدا ەلىمىزدە ساپالى انيماسيالىق فيلمدەر تۇسىرىلمەگەنىن اتاپ ءوتتى.
"وسىعان بايلانىستى انيماسيالىق يندۋستريانى كرەاتيۆتى يندۋستريالار قورىنىڭ اياسىندا دامىتۋ ورىندى بولماق. قور قۇرىلىمىندا انيماسيانى دامىتۋعا باعىتتالعان كرەاتيۆتى حاب جاساقتالۋدا"، دەيدى مينيستر.