قازاق ۇلتتىق حورەوگرافيا اكادەمياسى 3–4-سىنىپ وقۋشىلارى اراسىندا ىرىكتەۋ باستالعانىن حابارلايدى.
دارىندى بالالاردى قابىلداۋ قازاقستاننىڭ بارلىق وڭىرلەرىندە وتەدى جانە 2025 جىلدىڭ 24 ساۋىرىنە دەيىن جالعاسادى، دەپ حابارلايدى aqshamnews.kz.
اكادەميا كاسىبي بالەت ارتىستەرىن، حورەوگرافيا پەداگوگتارىن جانە وسى سالاداعى زەرتتەۋشىلەردى دايارلايتىن ەلىمىزدەگى جەتەكشى وقۋ ورنى بولىپ تابىلادى. وقىتۋ كوپ دەڭگەيلى جۇيە بويىنشا جۇرگىزىلەدى – باستاۋىش سىنىپتان باستاپ باكالاۆريات، ماگيستراتۋرا جانە دوكتورانتۋرا باعدارلامالارىنا دەيىن قامتيدى. ءبىلىم بەرۋ پروسەسىندە كلاسسيكالىق جانە زاماناۋي حورەوگرافيانى تەرەڭدەتىپ وقىتۋمەن قاتار، جالپى ورتا جانە جوعارى ءبىلىم بەرۋ باعدارلامالارى دا ۇسىنىلادى. بۇل تۇلەكتەرگە الەمنىڭ جەتەكشى تەاترلارى مەن وقۋ ورىندارىندا كاسىبىن جالعاستىرۋعا مۇمكىندىك بەرەدى.
ىرىكتەۋ بارىسىندا كاسىبي حورەوگرافيا سالاسىندا وقۋعا بەيىمى بار دارىندى بالالار انىقتالادى. اكادەميانىڭ قابىلداۋ كوميسسياسى بالالاردى قاراۋ ءۇشىن ايماقتارعا ارنايى بارادى. الدىن الا ىرىكتەۋدەن ءساتتى وتكەن ۇمىتكەرلەر 2025 جىلدىڭ ماۋسىم–شىلدە ايلارىندا استانادا وتەتىن ءتۇسۋ ەمتيحاندارىنا شاقىرىلادى. ەمتيحاندى ءساتتى تاپسىرعان وقۋشىلار اكادەميانىڭ تولىققاندى ءبىلىم الۋشىلارى قاتارىنا قوسىلىپ، حورەوگرافيا ونەرىنىڭ قىر-سىرىن مەڭگەرۋ مۇمكىندىگىنە يە بولادى.
ىرىكتەۋ وتكىزىلەتىن كۇن، ۋاقىت جانە ورىن تۋرالى تولىق اقپارات اكادەميانىڭ رەسمي الەۋمەتتىك جەلىلەردەگى پاراقشالارىندا جاريالانادى: https://www.instagram.com/balletacademy_kz، https://balletacademy.edu.kz/kz، https://www.facebook.com/BALLETACADEMYKZ/