الىپتار ايقاسى
«قازاق تيتانى» لاقاپ اتىمەن تانىمال الىپ كۇش يەسى المات جۇمانوۆ «Wicked N’ Bad نا Dubai P7 Arena» پروموۋشەنىنىڭ دۋبايدا (ءباا) وتكەن تۋرنيرىندە ونەر كورسەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
Sports.kz سايتىنىڭ مالىمەتىنشە، ا.جۇمانوۆ تۋرنيردە ءوزىن «يران حالكى» دەپ اتايتىن وزگە پالۋان سادجاد گاريبيمەن كەزدەستى.
ولار جەكپە-جەكتى بوكس ەرەجەسى بويىنشا ەكى مينۋتتان ءتورت راۋند فورماتىندا وتكىزدى.
ايقاستا «قازاق تيتانى» جەڭىسكە جەتتى – ول ءبىرىنشى راۋندتا-اق وپپونەنتىن تەحنيكالىق نوكاۋتقا جىبەردى.
ەسكە سالايىق، «قازاق تيتانى» الىپ زاتتاردى كوتەرۋمەن، سۇيرەۋمەن تانىمال. ول بيىلعى ءساۋىر ايىندا ان-72 ۇشاعىن ورنىنان قوزعاپ، گيننەس رەكوردتار كىتابىنا ەندى.
ال «يران حالكى» بوديبيلدينگتە اۋىر زاتتاردى كوتەرۋمەن تانىمال. ونىڭ دەنە ءبىتىمى الەۋمەتتىك جەلىدە تانىمالدىلىق الىپ كەلدى: بويى 188 سم، سالماعى 177 كگ (ونىڭ كوبى بۇلشىق ەت).