ابايدان رۋحاني ازىق الاتىن ۇستاز
«الماتىنىڭ جىل ءمۇعالىمى» بايقاۋىنىڭ گران-پري يەگەرى قازاق ءتىلى مەن ادەبيەتى ءپانىنىڭ وقىتۋشىسى نۇرجىگىت امانوۆ قالا اكىمىنىڭ قولىنان ەكى بولمەلى پاتەردىڭ كىلتىن العان بولاتىن. ول قالا بويىنشا ىرىكتەلىپ الىنعان 31 ۇستازدىڭ ىشىنەن ۇزدىك شىققان، دەپ حابارلايدى Almaty-akshamy.kz
قازىرگى تاڭدا نۇرجىگىت امانوۆ الماتىداعى ايگىلى رەجيسسەر سۇلتاناحمەت قوجىقوۆ اتىنداعى №39 مامانداندىرىلعان ليسەيدە قازاق ءتىلى مەن ادەبيەتى ءپانىنىڭ ءمۇعالىمى بولىپ قىزمەت اتقارادى.
ۇستاز سيفرلىق ءبىلىم بەرۋ تەحنولوگياسىن جاساپ شىققان. ونىڭ ايتۋىنشا، قازىرگى زامان وقۋشىلارىنىڭ ءبىلىمدى قابىلداۋ قابىلەتى، بۇرىنعى كەزبەن سالىستىرعاندا وزگەشە. بالالارعا بىردەن قابىلداپ، الاتىنداي ەرەكشە دۇنيە قاجەت.
«مەن «New generation» – سيفرلىق ءبىلىم بەرۋ تەحنولوگياسىن جازىپ شىقتىم. ول قازىرگى زامانعا ساي جازىلعان. بۇل - وقۋشى مەن ۇستازدىڭ ءبىلىم بەرۋدەگى اراقاتىناسىن جەتىلدىرە تۇسەتىن اقپاراتتىق تەحنولوگيا. قازىرگى زامان وقۋشىلارىنىڭ قابىلداۋ قابىلەتى، بۇرىنعى كەزبەن سالىستىرعاندا باسقاشا. بۇل – سيفرلىق ءبىلىم بەرۋ تەحنولوگياسى ققق+تتت=ف ءبىلىم بەرۋ فورمۋلاسى. «New generation»دەگەن فورمۋلاعا نەگىزدەلگەن. «New generation»– سيقىرلى ءبىلىم بەرۋ جوباسى ارقىلى بەرىلەتىن ءاربىر ساباق قىزىقتى، قيىن، قۇندى بولۋ كەرەك. تالعامىن، تانىمىن دامىتىپ، تالداي ءبىلۋ. وقۋشىنىڭ بويىندا وسى 6 قابىلەت بولسا، وندا بالادان فۋنكسيونالدىق ساۋاتتىلىق قالىپتاسقان تۇلعا شىعادى. قازىرگى تاڭدا وسى تەحنولوگيانى مەكتەپتە قولدانىپ جاتىرمىز. دەگەنمەن ءبىز، ۇستازدار، «جاڭاشىلدىق»، «جاڭارۋ دەگەن وسى ەكەن» دەپ، وتكەننەن قول ءۇزىپ كەتۋگە بولمايدى. ءبىلىم بەرۋدەگى جاڭاشىلدىق الەمدىك ستاندارتقا جاۋاپ بەرگەنىمەن، تاربيە بەرۋدەگى ادىس-تاسىلدەرىمىز اتا-بابامىز سان عاسىرلار بويى قالىپتاستىرعان ستاندارتقا ساي بولۋى كەرەك. سوندا عانا قازاق ۇلتى ءتۇرلى وركەنيەتتەر اعىمىندا كەتپەي، وزىندىك بولمىسىن ساقتاپ قالاتىن بولادى»، – دەيدى ءمۇعالىم.
نۇرجىگىت امانوۆ - بالا كەزدەن ابايدى وقىپ، وزىنە رۋحاني ازىق الاتىن ۇستاز. «اباي الەمى» جوباسىن جاساعان. سونىمەن قاتار مەكتەپتەگى ءبىلىم جوسپارىنا دا ابايدىڭ شىعارماسى مەن ولەڭدەرىن ەنگىزگەن. ءار ساباق سايىن 5 مينۋت ابايعا توقتالادى.
«جوبانىڭ «اباي الەمى» دەپ اتالۋىنىڭ باستى سەبەبى – ابايدان بۇكىل ادام رۋحاني ازىق الادى. مەكتەپتىڭ باستى باعىتى نە؟ كەز كەلگەن نارسەنىڭ تالىم-تاربيەلىك ءمانى ەسكەرىلەدى. سول سەكىلدى اباي نەگە ءمان بەردى؟ ءبىز دە سوعان ءمان بەرە وتىرىپ جاسادىق. مەن ءار ساباعىمنىڭ 5 مينۋتىن ابايعا ارنايمىن. جاڭا ايتىپ وتكەندەي، «New generation» جوباسىنا ءاربىر ساباققا ابايدىڭ ولەڭدەرىن، شىعارمالارىن ەنگىزىپ، جوسپار جاساعام»، – دەيدى ول.
ايتا كەتەيىك، «اباي الەمى» جوباسى ابايدىڭ 175 جىلدىعىنا وراي ۇيىمداستىرىلعان. اتالمىش جوبا بۇكىل قالا بويىنشا ەڭ ۇزدىك جوبا رەتىندە تانىلىپ، ارنايى ءبىلىم باسقارماسىنىڭ ماراپاتىنا يە بولعان. الماتىنىڭ جىل ءمۇعالىمى ۇيىمداستىرۋشىلارعا العىس ءبىلدىردى.