بۇگىندە قازاقستاندا سپورت سالاسىنىڭ دامۋ قارقىنى بايقالعانىمەن، شەشىمىن تاپپاعان كۇردەلى ماسەلەلەر ءالى دە بار. ەل بويىنشا سپورت مەكتەپتەرى مەن ءتۇرلى سەكسيالار كوبىنە ءىرى قالالاردا شوعىرلانعان.
ال اۋىلدىق جەرلەردە سپورت ينفراقۇرىلىمىنىڭ جەتكىلىكسىزدىگى - جاستاردىڭ سپورتپەن جۇيەلى تۇردە اينالىسۋىنا كەدەرگى كەلتىرىپ وتىر. بۇل - بۇقارالىق سپورتتى دامىتۋدا ۇلكەن توسقاۋىل.
تاعى ءبىر وزەكتى ماسەلە - كاسىبي سپورت ماماندارىنىڭ جەتىسپەۋشىلىگى مەن ولاردىڭ بىلىم-بىلىگىنىڭ زامان تالابىنا ساي بولماۋى. كوپتەگەن وڭىرلەردە بىلىكتى جاتتىقتىرۋشىلار تاپشى نەمەسە مۇلدە جوق. ال بار جاتتىقتىرۋشىلاردىڭ ءوزى جاڭا ادىستەمەلەر مەن حالىقارالىق ستاندارتتاردان الشاق. بۇل جاعداي جاسوسپىرىمدەر سپورتىنداعى ساپانىڭ تومەندەۋىنە اكەلۋى مۇمكىن.
سونىمەن قاتار، جاستار اراسىندا دەنە بەلسەندىلىگىنىڭ تومەندەۋى، گادجەتكە تاۋەلدىلىك جانە سالاۋاتتى ءومىر سالتىن ۇستانباۋ - قوعام ءۇشىن الاڭداتارلىق جاعدايعا اينالىپ وتىر. بۇل ۇلتتىق دەنساۋلىق پەن بولاشاق چەمپيونداردىڭ قالىپتاسۋىنا كەرى اسەر ەتەدى.
مەملەكەت بۇل باعىتتا ناقتى قادامدار جاساپ جاتىر. جاڭا سپورت كەشەندەرى مەن فيتنەس ورتالىقتارى سالىنىپ، حالىقارالىق جارىستار وتكىزىلىپ جاتىر. پرەزيدەنت قاسىم-جومارت توقايەۆتىڭ باستاماسىمەن بۇقارالىق سپورتتى دامىتۋ جانە ءاربىر مەكتەپتە دەنە شىنىقتىرۋ ساباقتارىنىڭ ساپاسىن ارتتىرۋ قولعا الىنۋدا. بۇعان قوسا، اۋىل جاستارىنىڭ سپورتقا قولجەتىمدىلىگىن كەڭەيتۋ ءۇشىن كەشەندى باعدارلامالار قاجەت.
قازاق سپورتىنىڭ قارقىندى دامۋى ءۇشىن تومەندەگى باسىم باعىتتارعا نازار اۋدارۋ قاجەت:
1. اۋىل سپورتىن دامىتۋ - ءار اۋىلدا سپورت الاڭدارى، سەكسيالار مەن ۇيىرمەلەر اشۋ؛
2. ماماندار دايارلاۋ مەن قايتا وقىتۋ - زاماناۋي ادىستەمەلەرمەن وقىتىلعان جاتتىقتىرۋشىلار سانىن كوبەيتۋ؛
3. بالالار جانە جاسوسپىرىمدەر سپورتىن قارجىلاندىرۋ - جاس بۋىنعا ارنالعان سپورتتىق باعدارلامالار مەن جارىستارعا قولداۋ كورسەتۋ؛
4. مەكتەپتەگى دەنە تاربيەسىن كۇشەيتۋ - وقۋ باعدارلاماسىن جەتىلدىرۋ، ساپالى كادرلار تارتۋ؛
5. اقپاراتتىق ناسيحات - سپورتتىڭ قوعامداعى ءرولىن ارتتىرۋ ماقساتىندا بۇقارالىق اقپارات قۇرالدارى ارقىلى بەلسەندى ءتۇسىندىرۋ جۇمىستارى جۇرگىزۋ.
ەگەر وسى باعىتتار جۇيەلى تۇردە جۇزەگە اسسا، قازاقستان بولاشاقتا الەمدىك سپورت ارەنالارىندا باسەكەگە قابىلەتتى ەلدەردىڭ قاتارىنان تابىلارى ءسوزسىز.