قازاق قىزى قىتايدىڭ مەملەكەتتىك سىيلىعىن الدى

تەلەحيكايادا ريزا قايسار قىز لي شۋيحۋانىڭ بەينەسىن سومدادى

قىتايلىق بەلگىلى ونەر جۇلدىزى ريزا ءالىمجان قىزى Flying Apsaras سىيلىعىن الدى. بۇل تۋرالى قىتايدىڭ The Paper اقپارات اگەنتتىگى جازدى، دەپ حابارلايدى Almaty-akshamy.kz.

بيىل 33ء-شى رەت ۇلەستىرىلىپ وتىرعان Flying Apsaras سىيلىعى قىتايدىڭ تەلەونەر سالاسىنداعى ەڭ جوعارى مەملەكەتتىك ماراپاتى. ريزا ءالىمجان قىزى «Minning Town» تەلەحيكاياسىنداعى ءرولى ءۇشىن «ۇزدىك اكتريسا» نوميناسياسىنىڭ يەگەرى اتاندى.

قازاقپاراتتىڭ مالىمەتىنشە، «Minning Town» تەلەحيكاياسى وتكەن جىلى قاڭتار ايىندا قىتايداعى كورەرمەنى ەڭ كوپ بەس تەلەارنادا قاتار كورسەتىلىپ، جۇرت وتە جوعارى باعالاعان. وعان قىتايدىڭ نينسيا دۇنگەن اۆتونوميالىق رەگيونىنىڭ سيحايگۋ ايماعىنداعى اۋىل تۇرعىندارىنىڭ كەدەيلىكپەن كۇرەسى ارقاۋ بولادى. تەلەحيكايادا ريزا قازىمىر اكەنىڭ قاتال ۇكىمىنە مويىن ۇسىنباي، تاعدىرىن ءوز قولىنا العان قايسار قىز لي شۋيحۋانىڭ بەينەسىن سومداپ، اكتەرلىك شەبەرلىگىمەن كورەرمەندەردى ءتانتى ەتەدى.

1 قاراشا كەشتە بەيجىڭدەگى شوۋگان ارەناسىندا وتكەن سىيلىق يەگەرلەرىن ماراپاتتاۋ راسىمىندە ريزا ءالىمجان قىزى تولقىپ تۇرىپ: «مەن باقىتتى ءھام تالايلى جان ەكەنمىن. قازىلار القاسىنا، ەڭبەگىمدى باعالاعان كورەرمەندەرگە مىڭ العىس. وزدەرىڭىزگە انا تىلىمدە العىسىمدى بىلدىرۋگە رۇقسات ەتىڭىزدەر، راقمەت!» دەپ اعىنان جارىلدى.

اشىق دەرەككوز بويىنشا، ريزا ءالىمجان قىزى 1986 جىلى شىلدەدە بەيجىڭدە تۋعان. ونەر جولىن ورتا مەكتەپتە اۋەسقوي مودەل بولۋدان باستاعان، 2002 جىلى بەيجىڭ كينەماتوگرافيا ينستيتۋتىن ءبىتىرىپ، اكتەرلىككە بەت ءبۇرادىۇ. 2011 جىلى «چجەن حۋان-نىڭ كەشۋلەرى» تەلەحيكاياسى ارقىلى تانىلدى.