قازاق قىزى تۇڭعىش رەت ەۆەرەستى باعىدىرماقشى، دەپ حابارلايدى اlmaty-akshamy.kz 24 KZ-كە سىلتەمە جاساپ.
باتىر ارۋدىڭ ەسىمى – انار بۋراشيەۆا. جەر شارىنىڭ ەڭ بيىك شىڭىنا ساپار 6 ساۋىردە باستالادى. الماتىدا جاساقتالعان ارنايى ەكسپەديسيانى تاجىريبەلى الپينيست ماقسۇت جۇمايەۆ باسقارادى. ەلىمىزدىڭ كوك تۋىن بيىككە كوتەرمەك ەكسپەديسيانىڭ ماقساتى – جاستاردى پاتريوتتىققا، سپورتقا تاربيەلەۋ.
32 جاستاعى انار بۋراشيەۆا سكايراننەر سپورتىنا دەيىن بانك مەنەدجەرى بولعان. قارجى سالاسىن ارتقا تاستاپ، تاۋلاردا جۇگىرىپ جۇرگەنىنە 10 جىلعا جۋىقتاپتى. الماتى مارافونىنىڭ تۇراقتى قاتىسۋشىسى تالعار ءحانتاڭىرى شىڭى، مونبلان جانە كيليماندجارو سىندى بيىكتىكتەردى ەڭسەرگەن. ەندىگى ماقساتى – اسپانمەن تالاسقان ەۆەرەستى باعىندىرۋ. ول تەڭىز دەڭگەيىنەن 8848 مەتر بيىكتىكتە ورنالاسقان.
انار بۋراشيەۆا، سكايراننەر-سپورتشى:
- بىرىنشىدەن، بۇل مەنىڭ ارمانىم بولعان، الەمنىڭ ەڭ بيىك شىڭىنا شىعۋ. ءبىرىنشى قازاق قىزى بولۋ، مەنىڭ ويىمشا، وتانىمىز ءۇشىن وتە ماڭىزدى. سوندىقتان قازاق قىزدارى وتە مىقتى دەگەندى كورسەتكىم كەلەدى.
اناردىڭ العا قويعان ماقساتى ورىندالسا، الەمنىڭ ەڭ بيىك شىڭى – ەۆەرەستكە شىققان العاشقى قازاق قىزى اتانادى. وسىعان دەيىن بۇل مەجەنى الەمدە 799 ايەل باعىندىرىپتى. مۇنداي اتاققا يە بولۋ وڭاي ەمەس، – دەيدى 8848 مەترلىك شىڭعا قازاقتىڭ تۋىن ەكى رەت تىككەن ماقسۇت جۇمايەۆ. جارتىجىلدىق فيزيكالىق دايىندىقتان بولەك، سپورتشىنىڭ جۇيكەسى بەرىك بولۋ كەرەك.
ماقسۇت جۇمايەۆ، ەكسپەديسيا جەتەكشىسى:
- ءبىزدىڭ كوماندانىڭ جەتىستىگى ءماندى بولعانىن قالايمىن. مىسالى، وسى جولعى ەڭبەگىمىزدى سوعىس ارداگەرلەرى، باتىرلارىمىز ساعادات نۇرماعامبەتوۆ، راقىمجان قوشقاربايەۆ جانە ءاليا مولداعۇلوۆانىڭ 100 جىلدىعىنا ارنايمىز. ەۆەرەستى باعىندىرۋ – ۇلكەن مۇمكىندىك. سەبەبى انار وسى ەرلىگى ارقىلى قازاق قىزدارىنا ۇلگى بولادى.
7 ادامنان تۇراتىن توپ 6 ءساۋىر كۇنى الماتى-دوحا باعىتى ارقىلى نەپالعا ۇشادى. اۋەلى 5300 مەتردە ورنالاسقان ەۆەرەست بازالىق لاگەرىنە ورنالاسىپ، تاۋ جاعدايىنا بەيىمدەلەدى. وزدەرىنىڭ كومەكشىلەرى شەرپالارمەن تانىسادى. ەكسپەديسيا مۇشەلەرى ءار شاقىرىم سايىن ارنايى لاگەردە تىنىعىپ، كۇش جينايدى. ماقسۇت جۇمايەۆتىڭ ايتۋىنشا، ەۆەرەستىڭ سوڭعى 848 مەترى اسا ءقاۋىپتى ەكەن. ولار شىڭ باسىنا 16 ساعاتتا شىعىپ، 8 ساعاتتا ءتۇسۋدى جوسپارلاپ وتىر.