قاڭتار-ناۋرىز ايلارىندا قازاقستان مەن وزبەكستاننىڭ ءوزارا تاۋار اينالىمى 1،09 ملرد دوللارعا جەتتى.
بۇل، وتكەن جىلدىڭ سايكەس كەزەڭىمەن سالىستىرعاندا، 11 پايىزعا كوپ. بۇدان بولەك، ەكى ەل بىرلەسكەن ينۆەستيسيالىق جوبالاردى جۇزەگە اسىرا باستادى. شەكارالىق ساۋدا ورتالىعىن قۇرۋ جونىندەگى جوسپار ءىس جۇزىندە ورىندالىپ جاتىر. وسىعان جاۋاپتى ۇكىمەتارالىق كوميسسيانىڭ تاياۋدا 20-وتىرىسى وتپەك، دەپ حابارلايدى Almaty-akshamy.kz 24.kz-كە سىلتەمە جاساپ.
- بۇل - تاشكەنتتىڭ جاڭا ورتالىعى. وزبەكستاننىڭ ەكونوميكالىق الەۋەتى مەن قۋاتىن كورسەتىپ، الىستان مەنمۇندالاپ تۇرعانداي. قالانىڭ شىرايىن ارتتىرعان بيىك عيماراتتار وسىندا شوعىرلانعان. «تاشكەنت سيتي» اتالىپ كەتكەن ورىن قىزىلوردانىڭ سەمەنتىمەن سالىندى. كورشىمىزدىڭ ءونىمدى بىزدەن ساتىپ الۋىنا جوعارى ساپا ءارى ءتيىمدى باعا سەبەپ بولعان، - دەيدى تەلەارنا ءتىلشىسى راۋان مىڭبايەۆ.
قازاق پەن وزبەك ءوزارا ساۋدانى دامىتىپ، كولىك-لوگيستيكا سالاسىنداعى ىنتىماقتاستىعىن جولعا قويدى. الا شاپاندى اعايىن قازاقستان ارقىلى جۇڭگو مەن رەسەيگە ەكسپورتتىق ءونىمىن جونەلتەدى. اقتاۋ پورتىنىڭ مۇمكىندىگى ارتسا، ترانسكاسپيي ءدالىزىن قولدانۋعا دا دايىن. ەلىمىز ءبىر عانا تاسىمالدان مول تابىس تابادى. دەگەنمەن دايىن بۇيىم جاساۋ مىندەتى دە بار. تاشكەنت ونەركاسىپ كورمەسىنە قاتىسقان قىزىلوردالىق ەكى كاسىپورىن وسى سالاداعى الەۋەتىمىز مول ەكەنىن كورسەتتى. ءوڭىر سەمەنت جانە شىنى شىعارۋ ءىسىن تانىستىردى.
- ءبىز ىشكى نارىققا دا، سىرتقا دا جۇمىس ىستەيمىز. سنگ توڭىرەگىندە رەسەي الادى. وزبەكستان، تاجىكستان جانە باسقا دا ورتالىق ازياداعى مەملەكەتتەر بىزبەن سەرىكتەس. جالپى، شىنى جايلى تۇتىنۋشىلار جاقسى پىكىردە، - دەيدى شىنى شىعاراتىن زاۋىتتىڭ وكىلى نۇرجان مۇحيت.
ال ەكى ەل بىرلەسىپ قۇراتىن ونەركاسىپتىك كووپەراسيا - تۇتاس ورتالىق ازيانىڭ الەۋەتىن نىعايتۋعا سەپ. تۇركىستان مەن وزبەكستاننىڭ سىرداريا وبلىسىن بايلانىستىراتىن حالىقارالىق شەكارالىق ساۋدا ورتالىعىنىڭ قۇقىقتىق نەگىزى شىلدە ايىنا دەيىن دايىن بولادى. ءقازىر ينۆەستيسيالىق 38 جوبا رەت-رەتىمەن جۇزەگە اسىپ جاتىر. ەكەۋى بىلتىر ىسكە قوسىلدى. بيىل بىرلەسكەن بولات ءوندىرىسى، اۆتوكولىك قۇراستىرۋ جانە جەڭىل ونەركاسىپ جوباسى قولعا الىندى.
- ساۋدا-ەكونوميكالىق الەۋەتتى ارتتىرۋدىڭ ماڭىزدى باعىتتارىنىڭ ءبىرى - وڭىرلىك ىنتىماقتاستىق. وسىعان بايلانىستى ءبىرقاتار ءىس-شارالار وتكىزۋ تۋرالى شەشىم قابىلداندى. ماسەلەن، وڭىرلىك ىنتىماقتاستىق فورۋمىن ۇيىمداستىرۋدى كوزدەپ وتىرمىز. وعان اكىمدەر مەن بيزنەس قۇرىلىم جەتەكشىلەرى قاتىسىپ، ارىپتەستىكتى ودان ءارى نىعايتۋعا ۇلەس قوسا الادى،-دەيدى وزبەكستان رەسپۋبليكاسىنىڭ ينۆەستيسيالار، يندۋستريا جانە ساۋدا ءمينيسترى لازيز كۋدراتوۆ.
قازاقستان ۇكىمەتى تۇركىستاندا كلاستەرلىك ماقتا شارۋاشىلىعىن قۇرۋعا دا مۇددەلى. وڭىردە اق التىن ەگەتىن جەر جەتكىلىكتى. جوباعا ينۆەستور كەرەك. وزبەكستاننان دا نيەتتى توپ قاراستىرىلىپ جاتىر. تاجىريبەسىمەن ءبولىسىپ، ءوندىرىستى جولعا قويىپ بەرۋگە ءتيىس. قارجىنىڭ باسىم بولىگىن مەملەكەت بولەدى. ناتيجەسىندە ەلدە تەرى وڭدەپ، بىلعارى جانە كيىم شىعاراتىن ايماق پايدا بولادى.