قازاق ونەرى بەلگيادا دارىپتەلدى

قازاقستاندىق ديزاينەر ايگۇل جانسەرىكوۆانى ەۋروپالىق «مادەنيەت كەرۋەنى» اكادەمياسى ارنايى شاقىرتقان.

قولونەر شەبەرى - قازاقستاندا كيىز باسۋ ونەرىن جاڭعىرتىپ، ونى جاڭا تەحنولوگيامەن دامىتقان كاسىپكەر. الماتىدا Qazaq-Oner ورتالىعىن اشىپ، 20 جىلدان بەرى ساف ونەردى كوپشىلىككە ناسيحاتتاپ كەلەدى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ. 

ەۋروپالىقتار شەبەردىڭ كورمەسىن تاماشالاپ، كوزدىڭ جاۋىن الاتىن كيىمدەر مەن بۇيىمداردى كوپتەپ ساتىپ الدى. كونە مەن جاڭانىڭ ۇندەستىگىن جەتە مەڭگەرگەن مامان كوپشىلىككە قولونەر ورتالىعىنىڭ جۇمىسى جايلى بايانداپ، تاجىريبەسىمەن ءبولىستى.

«قازاقستاندى ءبىز تەك قانا ونىڭ مادەنيەتى ارقىلى تانىستىرا الامىز. وسىنداي ۇلكەن مۇمكىنشىلىك بار دەپ شاقىرعاننان كەيىن كەلدىم. ونەر ارقىلى ءبىزدىڭ مادەنيەتىمىزدىڭ تەرەڭدەگىن بىلۋگە بولادى. سول ارقىلى ءبىزدىڭ ونەرلى حالىق ەكەنىمىزدى، باسقالاردان ەرەكشەلىگىمىز بار ەكەنىن بىلدىرەمىز»، - دەيدى ديزاينەر ايگۇل جانسەرىكوۆا. 

«مەن مىناداي كەرەمەت بۇيىم ساتىپ الدىم. جىبەك پەن جۇننەن جاسالعان تازا تابيعي ءونىمنىڭ ساپاسى وتە جوعارى. دەنساۋلىققا پايدالى. قولمەن، ەرەكشە ماحابباتپەن جاسالعانى كورىنىپ تۇر. ەلدەرىڭىزگە ساپارلاپ، وسى شەبەرحانانى كورسەم دەيمىن»، - دەدى بريۋسسەل قالاسىنىڭ تۇرعىنى مەريەم ۆان سيماەس.