قازاق بالاسى بيتبوكستان جەڭىمپاز اتاندى.
ورالدىق ەلدار عابدۋللين بيتبوكستەن اقش-تا وتكەن الەم چەمپيوناتىندا ۇزدىك اتاندى، دەپ حابارلايدى Almaty-akshamy.kz. 24.kz-كە سىلتەمە جاساپ.
وتانداسىمىز ءۇشىن ونلاين رەجيمدە ۇيىمداستىرىلعان بايقاۋدا توپ جارۋ وڭاي بولماپتى. ينتەرنەتتەگى اقاۋلارعا بايلانىستى ءوزى ورىنداعان شىعارمانى بىرنەشە مارتە قايتا جازۋعا تۋرا كەلگەن. ءبىراق جەڭىسكە دەگەن جىگەرى العا جەتەلەگەن جاس اقىرى ءوزىن مويىنداتىپ، باس جۇلدەگە لايىق دەپ تانىلدى. بۇل بيتبوكس شەبەرىنىڭ الداعى چەمپيوناتتاردا ب ا ق سىناۋىنا مۇمكىندىك بەرەدى ەكەن. بيتبوكسينگ – بۇل داۋىس، اۋىز بەن ەرىن جانە ءتىلدىڭ كومەگىمەن ءتۇرلى اۋەندەردى شىعارۋ ونەرى. العاش رەت امەريكادا پايدا بولىپ، كەيىن باسقا قۇرلىقتارعا تارالعان. ەلدار عابدۋللين بيتبوكسپەن 2015 جىلدان بەرى اينالىسا باستاپتى. باسىندا ونەردىڭ قاي ءتۇرىن تاڭداسام دەپ كوپ ويلاندىم. كەيىن ءدال وسى جانردىڭ جانىما جاقىن ەكەنىنە كوزىم جەتتى، - دەيدى ول.
«تەلەديداردان كوردىم، ءبىر بەند سياقتى، گرۋپپا جينالدى سوسىن. جىلدام تۋتويرل ىستەپ، پپ بوچكا، تس-حلەد، تشش حەد، سونىڭ ءبارىن جىلدام ۇيرەنىپ الىپ، وسىمەن اينالىسىپ كورەيىن دەپ ويلادىم»، - دەدى بيتبوكستەن الەم چەمپيونى ەلدار عابدۋللين.
ەلداردىڭ ەشقانداي مۋزىكالىق ءبىلىمى جوق. دەگەنمەن ۇزدىكسىز ىزدەنىستىڭ ارقاسىندا جاڭا جانردى جىلدام مەڭگەردى. ءتىس پەن ءتىلدىڭ اراسىنان شىعاتىن ءتۇرلى دىبىستى ءبىر جۇيەگە ءتۇسىرىپ، وزىندىك ريتميكالىق باعىتىن تاپتى. الەمدىك دەڭگەيدەگى بيتبوكسەرلەردى مويىنداتتى. بيتبوكستىڭ ەلىمىزدە كەڭ تارالا قويماعانىن ەسكەرسەك، جەڭىستىڭ دە وڭاي كەلمەگەنى تۇسىنىكتى