بۇگىن – قازاقستانداعى عىلىم قىزمەتكەرلەرى كۇنى.
1990 جىلدارى ەلدە عالىمداردىڭ سانى 40 مىڭداي بولسا، ءقازىر 23 مىڭنان اسادى. توقىراۋ كەزەڭىندە عالىمدارىمىزدىڭ كوبى بيزنەسكە بەت بۇرسا، ءبىرشاماسى شەتەل اسقان. بۇل كۇندە سول وزگە ەلدە عىلىممەن اينالىسىپ جۇرگەن قازاق عالىمدارى ەلدىڭ جاس عالىمدارىن وقىتىپ ءجۇر، دەپ حابارلايدى اlmaty-akshamy.kz.
- كوپشىلىك سول ءوزىمىزدىڭ جەرلەستەرىمىز سول جاقتا جۇمىسىن جالعاستىرا بەرسە دەگەن ويدامىز. كەلىپ جاتاتىن بولسا، بىزگە وسى ەلىمىزدىڭ جاس عالىمدارىن تاربيەلەۋدە كومەكتەسەدى. ول بىزگە ەڭ وڭتايلى جولداردىڭ ءبىرى. ويتكەنى ناقتى الەمدىك دەڭگەيدە جۇزەگە اسىپ جاتقان عىلىمي جەتىستىكتەردىڭ وزدەرى سول باسەكەلەستىك دەڭگەيىندە بولۋ كەرەك. كەلەم دەگەندەردى لابوراتورياعا قالىپتاستىرۋ كەرەك. جاس عالىمداردى بەرۋ كەرەك تاربيەلەۋگە، دەيدى عىلىم جانە جوعارى ءبىلىم ۆيسە-مينيسترى دارحان احمەد-زاكي.
رەسمي دەرەكتەرگە سۇيەنسەك، كەيىنگى ون جىلدا ەلدەگى عىلىم سالاسىنا بولىنگەن قارجى جالپى ىشكى ءونىمنىڭ 0.13 پايىزىنان اسقان ەمەس. ال كەلەشەكتە بۇل كورسەتكىشتى 1 پايىزدان اسىرۋ كوزدەلىپ وتىر. كەيىنگى 3 جىلدا بۇل سالاعا 650 ملرد-تان استام قارجى بولىنگەن.
- عىلىمنىڭ دامۋى ءۇشىن عىلىم سالاسىنىڭ بەدەلىن كوتەرۋ قاجەت دەپ ويلايمىن. جاستار ءوز ەلىمىزدە دە مۇمكىندىگى مول زەرتحانالار بارىن، مەملەكەتتىك قولداۋدىڭ بارىن ءبىلۋى قاجەت. سوندا ەل جاستارى عىلىمعا قىزىعىپ، ءارتۇرلى جاڭاشىلدىقتار اشاتىن بولادى، - دەيدى نۋ ۇعا بيوينجەنەريا جانە رەگەنەراتيۆتى مەديسينا زەرتحاناسىنىڭ مەڭگەرۋشىسى شولپان اسقاروۆا،
عىلىمنىڭ ءار سالاسى ماڭىزدى. ءبىرىن كەيىنگە قالدىرىپ، ەكىنشىسىنە باسىمدىق بەرە المايمىز.
- عىلىمنىڭ كەز كەلگەن سالاسى ماڭىزدى. مىسالعا ءبىز پاندەميا كەزىندە سەزىندىك بيوتەحنولوگيانى، تاعى باسقا مەديسينا سالاسىن دامىتۋ كەرەك ەكەنىن، سوعان قارجى كوپتەپ قۇيۋ كەرەك ەكەنىن سەزدىك. ال ەندى بۇگىنگى تاڭدا قازاقستاندا بولىپ جاتقان تابيعي اپاتتارعا قاراي وتىرىپ، سۋ سالاسىنىڭ ماماندارىن، گيدرولوگتاردى، گەولوگيا سالاسىنداعى عالىمداردى، تاعى باسقا وسى سالاعا باسىمدىق بەرۋ كەرەك ەكەنىن ءبىلىپ جاتىرمىز. ەرتەڭ وسىنداي ءبىر كەز كەلگەن كەمشىلىكتەردىڭ بولۋىن بولدىرماس ءۇشىن عىلىمنىڭ كەز كەلگەن سالاسىنا مۇمكىندىك بەرۋ قاجەت، - دەيدى ساتبايەۆ ۋنيۆەرسيتەتىنىڭ ينجەنەرلىك بەيىندى زەرتحانا جەتەكشىسى ازات سەيتحان.
بۇعان دەيىن ەلدە عىلىمنىڭ 96 سالاسى بولسا، الداعى ۋاقىتتا ولار بىرىكتىرىلىپ، ناقتى 6 باسىم باعىتى بويىنشا جۇمىس اتقارىلادى. ونىڭ ىشىنە الەمدىك عىلىمنىڭ، تەحنولوگيانىڭ جاڭا باعىتتارى نازارعا الىندى.
يستوچنيك: https://24.kz/kz/zha-aly-tar/bilim-zh-ne-ylym/item/647493-aly-alaj-aza-ylymy
قولدانىلعان ماتەريالدارعا مىندەتتى تۇردە www.24.kz سايتىنا گيپەرسىلتەمە بەرىلۋى ءتيىس