«ۇلتتىق مۇرا» جوباسى اياسىندا استانا قالاسىنداعى ق ر ۇلتتىق ارحيۆىندە قازاق حالقىنىڭ زەرگەرلىك ونەرى مەن ونىڭ مادەني مۇرامەن بايلانىسىنا ارنالعان «ايەلگە اسەمدىك جاراسادى» اتتى كورمە ۇيىمداستىرىلدى.
كورمەگە ۇلتتىق قولدانبالى ونەر مەن ءسان الەمىنىڭ جاڭا تولقىنى ۇيلەسىم تاپقان قۇندى جادىگەرلەر، ارحيۆتىك قۇجاتتار، عىلىمي زەرتتەۋلەر قويىلدى، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
كورمەنىڭ ەڭ قۇندى جادىگەرلەرىنىڭ ءبىرى – XIX عاسىردىڭ باسىندا جاسالعان كۇمىس بەلدىك پەن رەسەي ارحيۆىنەن تابىلعان سول بەلدىكتى تاعىپ تۇسكەن ايەل ادامنىڭ سۋرەتى. سونىمەن قاتار، قازاق زەرتتەۋشىلەرىنىڭ، سونىڭ ىشىندە اقسەلەۋ سەيدىمبەكتىڭ ۇلتتىق كيىمدەر، اشەكەي بۇيىمدار مەن اسىل تاستار تۋرالى قولجازبا زەرتتەۋ ەڭبەكتەرى كورەرمەن نازارىنا ۇسىنىلدى.
«ارحيۆ-2025» مەملەكەتتىك باعدارلاماسى اياسىندا الماتى قالاسىنداعى ق ر ورتالىق مەملەكەتتىك كينو-فوتوقۇجاتتار مەن دىبىس جازبالارى ارحيۆىندە «قازاق دالا مادەنيەتىندەگى ايەلدەردىڭ مارتەبەسى» اتتى دوڭگەلەك ۇستەل ءوتتى.
ءىس-شاراعا تاريحشى عالىمدار، ەتنوگرافتار، فيلولوگتار، ادەبيەتتانۋشىلار، كينەماتوگرافيستەر، سۋرەتشىلەر جانە مۋزەي قىزمەتكەرلەرى قاتىستى.
دوڭگەلەك ۇستەل قاتىسۋشىلارىنا XIX-XX عاسىرلارداعى قازاق ايەلدەرىنىڭ ءومىرىن بەينەلەيتىن ارحيۆتىك فوتو جانە بەينەماتەريالدار كورمەسى ۇسىنىلدى. ەكسپوناتتار قاتارىندا ماسكەۋ، سانكت-پەتەربۋرگ جانە گامبۋرگ ەتنوگرافيالىق مۋزەيىنىڭ ارحيۆتەرىنەن الىنعان بىرەگەي قۇجاتتار بار.