جىل سايىن ەلىمىزدەگى مەكتەپتەردى 150 مىڭعا جۋىق وقۋشى 11 سىنىپتى ءبىتىرىپ شىعادى. ادەتتە ۇلكەن ومىرگە قادام باسقالى تۇرعان جوعارى سىنىپ جەتكىنشەكتەرىن ءجيى تولعاندىراتىن ماسەلەلەردىڭ ءبىرى – ماماندىق تاڭداۋ. سوندىقتان "كىم بولاسىڭ؟" دەگەن سۇراققا اركىم ءارتۇرلى جاۋاپ بەرەدى.
ەر بالالار كوبىنەسە اسكەري ادام بولۋدى قالاپ، جوعارعى اسكەري وقۋ ورىندارىنا جول تارتىپ جاتادى. سونىڭ ىشىندە كەيبىرى قازاقستان رەسپۋبليكاسى ۇلتتىق ۇلانىنىڭ اسكەري ينستيتۋتىن تاڭدايدى. اسكەري ينستيتۋت 1997 جىلى قۇرىلعان بولاتىن. سول جىلداردان باستاپ ينستيتۋت تۇلەكتەرى قوعامدىق ءتارتىپتى جانە مەملەكەتىمىزدىڭ اۋماقتىق تۇتاستىعىن قامتاماسىز ەتۋگە اتسالىسىپ كەلەدى. ۇلتتىق ۇلاننىڭ اسكەري ينستيتۋتى قۇرىلعاننان بەرى 4000-عا جۋىق وفيسەر دايىندالعان. 49 تۇلەك ينستيتۋتتى التىن مەدالمەن ءتامامداپ، 270 تۇلەك ۇزدىك ديپلوممەن بىتىرگەن.
بەكزات سوپىبەك،
ۇلتتىق ۇلان اسكەري ينستيتۋتىنىڭ 4-كۋرس كۋرسانتى:
– مەن وسى ىرگەلى اسكەري ينستيتۋتتا ءبىلىم الىپ جاتقانىمدى ماقتان ەتەمىن. سەبەبى، بۇل ءبىلىم ورداسىنان جان-جاقتى شىڭدالىپ شىعاسىڭ. ينستيتۋت تۇلەكتەرى تەك ۇلتتىق ۇلاننىڭ بولىمدەرىندە عانا ەمەس، قورعانىس مينيسترلىگىنىڭ بولىمدەرىندە، ۇلتتىق قاۋىپسىزدىك كوميتەتى شەكارا قىزمەتىندە، توتەنشە جاعداي مينيسترلىگىندە، مەملەكەتتىك كۇزەت قىزمەتىندە، ىشكى ىستەر مينيسترلىگى مەن ۇلتتىق قاۋىپسىزدىك كوميتەتىنىڭ ارنايى ماقساتتاعى بولىمشەلەرىندە دە قىزمەت اتقارۋدا. 130-دان استام وفيسەر-تۇلەك «بۇركىت» ارنايى ماقساتتاعى بولىمشەلەرىندە ەڭبەك ەتەدى، ولاردىڭ 41ء-ى كۇرەڭ بەرەتتى كيىپ جۇرۋگە قۇقىلى.
بۇگىن ءبىزدىڭ ەلىمىزدىڭ باسشىلىعى اسكەري ينستيتۋتتىڭ وقۋ-ادىستەمەلىك بازاسىن ودان ءارى دامىتۋ جانە وقۋ ورنىن قازاقستان رەسپۋبليكاسى ۇلتتىق ۇلانى اكادەمياسىنا قايتا دايارلاۋ ماسەلەسىن قاراستىرۋدا. بۇل بىزگە جوعارى وقۋ ورنىنان كەيىنگى ءبىلىم بەرۋ باعدارلاماسى (ماگيستراتۋرا، دوكتورانتۋرا) بويىنشا اسكەرلەرىمىز ءۇشىن كادرلار دايارلاۋعا مۇمكىندىك بەرەدى.
تۇلەكتەردىڭ اراسىنان ءبىرىمجانوۆ ميراس، بايىمبەتوۆ ەرلان، سامات قادىربەكوۆ، ءتىنالين ءامىر، ازامات نۇرپەيىسوۆ سەكىلدى كيكبوكسينگتەن الەم چەمپيوندارى شىعىپ، قازىرگى تاڭدا جاس بۋىندى تاربيەلەۋدە. «اربانىڭ الدىڭعى دوڭگەلەگى قالاي جۇرسە، سوڭعىسى دا سول باعىتقا بەت الادى» دەمەكشى، قازىرگى كۇنى وقىپ جاتقان كۋرسانتتاردىڭ اراسىندا دا جەكپە-جەك توبەلەسىنەن الەم چەمپيونى، قاتارداعى جاۋىنگەر اراپباي ساۋران، پانكراتيوننان الەم چەمپيونى، قاتارداعى جاۋىنگەر زۋبايروۆ نياز بار.
ءبىز قاي كەزدە دە، قانداي جاعدايدا دا تاۋەلسىز قازاقستاننىڭ قالقانى بولۋعا دايىنبىز!
سەرىكبول سارسەنباي،
اسكەري ينستيتۋتتىڭ 4-كۋرس كۋرسانتى:
– مەكتەپ قابىرعاسىندا جۇرگەن كەزىمدە وفيسەر بولامىن دەپ ىشتەي شەشىپ تە قويعان بولاتىنمىن. وقۋعا ءتۇسۋ ءۇشىن عالامتوردى شارلاپ، قاجەتتى مالىمەتتەردى ەرىنبەي-جالىقپاي ىزدەستىرىپ، قۇجاتتاردى جيناستىرىپ، ۇلتتىق ءبىرىڭعاي تەستىلەۋ تاپسىرىپ، پەتروپاۆل قالاسىنداعى قازاقستان رەسپۋبليكاسى ۇلتتىق ۇلانىنىڭ اسكەري ينستيتۋتىنا وقۋعا ءتۇستىم. مىنە، كوزدى اشىپ-جۇمعانشا ءقازىر 4-كۋرستا وقىپ جاتىرمىن. اسكەري ينستيتۋتتا كۋرسانتتاردىڭ ساپالى ءبىلىم الۋىنا تولىقتاي جاعداي جاسالعان. ينستيتۋت وقۋ-ماتەريالدىق بازاسىمەن، قارۋ-جاراقپەن جانە تەحنيكامەن جاراقتاندىرىلعان. دالالىق جاعدايدا جاتتىعۋ جاساۋ ءۇشىن وقۋ ورتالىقتارى مەن اتىس الاڭدارى دا بار. ءوز كەزەگىندە تۇلەكتەر وقۋدى اياقتاپ، اسكەري بولىمدەرگە كەلگەندە، ءىس جۇزىندە جيناعان تاجىريبەسىن قينالماي قولدانۋىنا نەگىز بار ەكەندىگىن بىلدىرەدى.
بۇگىندە مۇندا، 4-كۋرستا الماتى قالاسىنان كەلگەن بەكزات سوپىبەك، ءداۋىر مولداحمەت، ەلامان نۇرپەيىسوۆ سەكىلدى كۋرسانتتار ءبىلىم الىپ جاتىرمىز. ماقساتىمىز – ەلىمىزدىڭ ۇلتتىق قاۋىپسىزدىگى مەن قوعامدىق ءتارتىبىن قامتاماسىز ەتۋ ءۇشىن ءبىز دە ءبىر كىرپىشى بولىپ قالانىپ، مەملەكەتىمىزدىڭ گۇلدەنۋى جولىندا ادال ەڭبەك ەتۋ. ەل سەنىمىن اقتاۋ. حالقىمىزدىڭ تىنىشتىعى مەن بەيبىت ءومىرىن كۇزەتۋدە كىرپىك قاقپاي تۇرعان ۇلتتىق ۇلانىمىزدىڭ ابىرويىن اسقاقتاتۋ.
ەلىمىزدە ورىن العان كەشەگى اۋىر كۇندەردە قاۋىپسىزدىگىمىزگە قالقان بولا بىلگەن قايسار ارىپتەستەرىمە ريزاشىلىعىم شەكسىز.