قاۋىپسىزدىك جۇيەلەرى پوليسياعا قوسىلعان قالا مەكتەپتەرىنىڭ «دابىل باتىرمالارى» تەكسەرىلۋدە

الماتى پوليسەيلەرى مەكتەپتەردى باقىلاۋدا

الماتى پوليسەيلەرى مەكتەپتەردى باقىلاپ، “دابىل باتىرمالارىنىڭ” تيىمدىلىگىن تەكسەرۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.

بۇرىن حابارلانعانداي، الماتى قالاسىنداعى جالپى ءبىلىم بەرەتىن مەكتەپتەردىڭ قاۋىپسىزدىك جۇيەلەرى پوليسياعا قوسىلعان.

«رەسەي فەدەراسياسىنىڭ قازان جانە پەرم قالالارىندا بولعان قايعىلى وقيعالاردى بارلىعى بىلەدى. بالالاردىڭ قاۋىپسىزدىگىن قامتاماسىز ەتۋ ماقساتىندا ءبىلىم بەرۋ مەكەمەلەرىندە الدىن الۋ شارالارى كۇشەيتىلدى. بۇگىنگى تاڭدا قالاداعى بارلىق 207 مەكتەپتە 4 414 بەينەباقىلاۋ كامەراسى ورناتىلدى، ونىڭ 2 620-سى جەدەل باسقارۋ ورتالىعىنا قوسىلعان. قالعاندارى جاقىن ارادا قوسىلاتىن بولادى. سونىمەن قاتار، ءبىلىم بەرۋ ۇيىمدارىن تەكسەرۋ، قالانىڭ بارلىق مەكتەپتەرىندە كۇزەت اگەنتتىگى مەن جبو-نا سيگنال بەرەتىن دابىل تۇيمەلەرى ورناتىلعانىن جانە جۇمىس ىستەپ تۇرعانىن كورسەتتى»، – دەدى الماتى قالالىق پوليسيا دەپارتامەنتىنىڭ باستىعى قانات تايمەردەنوۆ.

سونداي-اق، ءبىلىم بەرۋ مەكەمەلەرى دابىل قۇرىلعىلارىمەن جابدىقتالعان، ولاردا داۋىس زورايتقىش بايلانىس جۇيەسى دە بار، ءبىلىم بەرۋ ۇيىمدارىنىڭ اكىمشىلىك عيماراتتارىنا كىرۋدى باقىلاۋ جانە باسقارۋ ءۇشىن قوندىرعىلار ورناتىلعان. سونىمەن قاتار، 150 مەكتەپكە دەيىنگى ءبىلىم بەرۋ مەكەمەسى بەينەباقىلاۋ جۇيەسىمەن جابدىقتالعان.

«قازىرگى ۋاقىتتا الماتى قالاسى پد باسشىلىعىنىڭ تاپسىرماسى بويىنشا ءبىلىم بەرۋ ۇيىمدارىنىڭ قاۋىپسىزدىك جۇيەلەرىنە كەشەندى تەكسەرۋ جۇرگىزىلۋدە. ءبىزدىڭ بولىمشە قىزمەتكەرلەرى “دابىل باتىرمالارىنىڭ” جۇمىس ىستەۋ قابىلەتىن جانە ولاردىڭ ىسكە قوسىلۋىنا دەپارتامەنتتىڭ جەدەل باسقارۋ ورتالىعى، سونداي-اق، كۇزەت اگەنتتىگىنىڭ توبى قالاي ارەكەت ەتەتىنىن تەكسەرەدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.