قاتەرلى ىسىكتىڭ الدىن الۋ مۇمكىندىگى تۋدى

شىمكەنتتە يادرولىق مەديسينا سالاسى دامىپ كەلەدى.

مەملەكەت باسشىسى مەديسينا سالاسىندا جەكەمەنشىك ارىپتەستىكتى دامىتۋدى تاپسىرعان بولاتىن.  قاتەرلى ىسىكتى ەرتە ساتىسىندا انىقتايتىن پوزيتروندى-ەميسسيالىق توموگرافيالى ورتالىقتىڭ ارقاسىندا ەندى سىرقاتقا شالدىققان 5 مىڭ ادامعا دەر كەزىندە كومەك بەرىپ، ءولىم-جىتىمدى ەداۋىر ازايتۋعا مۇمكىندىك تۋدى.

رەسمي دەرەك بويىنشا، شىمكەنتتە جىلىنا ءبىر مىڭ ەكى ءجۇز ادام ونكولوگيالىق اۋرۋعا شالدىعادى ەكەن.

«كەلگەنىمە 15 كۇن بولدى. سودان بەرى ەم قابىلداپ جاتىرمىن. وزىمە ۇناپ جاتىر. ناتيجەسى شىعىپ جاتىر. اناليزدەر تاپسىردىق. ءبارى جاقسى. قالامىزدا ەمدەلۋگە مۇمكىندىك بار. بولماسا استانا، الماتىعا ۇزاققا بارۋعا تۋرا كەلەتىن ەدى»، - دەيدى تۇرعىن بولات تۇردىمۇراتوۆ.

مەملەكەتتىك-جەكەمەنشىك ارىپتەستىك - ءوز تيىمدىلىگىن دالەلدەپ كەلە جاتقان ءتاسىل. شىمكەنتتە وسى باعىتتا 6 جوبا ىسكە اسىرىلۋدا. بۇگىنگە دەيىن مەگاپوليستە كاسىپكەرلەردىڭ كومەگىمەن "قايتپاس" شاعىناۋدانىندا 500 ناۋقاستى قابىلدايتىن ەمحانا، بۇيرەك قىزمەتى ءالسىز ناۋقاستارعا ارنالعان ورتالىق جانە امبۋلاتورلىق ەمدەۋ ورنى سالىندى. بيىل ينۆەستور قارجىسىنا 800 ورىندىق كوپبەيىندى اۋرۋحانا قۇرىلىسى باستالادى.