2021 جىلى الماتى قالاسىندا قاتەرلى دەرتپەن اۋىراتىن 4482 ناۋقاس انىقتالدى.
الماتىدا قاتەرلى ىسىك اۋرۋىنان بولاتىن ءولىم-جىتىم ايتارلىقتاي تومەندەگەن، دەپ حابارلايدى Almaty-akshamy.kz
الماتى ونكولوگيالىق ورتالىعى باس دارىگەرىنىڭ ورىنباسارى جاننا قوجايەۆانىڭ ايتۋىنشا، 34،4% باستاپقى كەزەڭدە انىقتالعان. بۇل، ارينە، اۋرۋدى جەڭۋگە جانە ناۋقاستى ەمدەۋگە مۇمكىندىك بەرەدى.
«ەمدەۋدىڭ ەڭ ءتيىمدى ادىستەرىن قولدانۋ بولاشاقتا بارىنشا قولايلى ناتيجەمەن ەم جۇرگىزۋگە مۇمكىندىك بەرەدى»،- دەيدى مامان.
ايتا كەتۋ كەرەك، حيميوتەراپيا قاتەرلى ىسىك اۋرۋىن ەمدەۋدە ماڭىزدى ورىن الادى.
قازىرگى ۋاقىتتا ورتالىقتىڭ ارسەنالىندا حيميالىق پرەپاراتتاردىڭ 40-تان استام اتاۋى، 30-دان استام تارگەتتىك جانە گورموندىق پرەپاراتتار بار.
تەك وتكەن جىلدىڭ وزىندە ورتالىقتا 14696 پاسيەنت حيميوتەراپيالىق ەمدەۋدەن ءوتتى.
TrueBeam STX جوعارى ەنەرگەتيكالىق جەلىلىك ۇدەتكىشتەگى راديولوگيالىق بولىمشەدە وتكەن كەزەڭدە ونكولوگيالىق ناۋقاستارعا 32000-نان استام ساۋلەلىك تەراپيا سەانسى وتكىزىلدى.
«وسى اپپاراتتىڭ كومەگىمەن ءبىز ونكولوگيانىڭ كەز كەلگەن ءتۇرى بار ادامدار ءۇشىن اناعۇرلىم ءدال قارقىندى جانە كولەمدى ساۋلەلىك تەراپيا جۇرگىزەمىز. بۇل قوندىرعى ادامعا اسەر ەتپەستەن زاريادتالعان بولشەكتەردىڭ شوعىرىن ىسىكتىڭ وزىنە تىكەلەي باعىتتاۋعا مۇمكىندىك بەرەدى»، - دەپ ءتۇسىندىردى اوو ءبولىمىنىڭ مەڭگەرۋشىسى ەۆگەنيي يشكينين.
ونكولوگتار قازاقستاندىقتارعا قاتەرلى ىسىكتى ەمدەۋگە بولاتىنىن ەسكەرتەدى! ءبىرىنشى كەزەڭدە انىقتالعان اۋرۋ 90% ەمدەۋگە ۇلكەن مۇمكىندىك بەرەدى.
«وكىنىشكە وراي، حالىق ەلىمىزدە جۇرگىزىلەتىن تەگىن سكرينينگتەن ءوتۋدى ءجيى ەلەمەيدى. سوندىقتان ءبىز تاعى دا ەسكەرتەمىز جانە پروفيلاكتيكالىق تەكسەرۋلەردەن ۋاقتىلى وتۋگە شاقىرامىز»، - دەپ اتاپ ءوتتى باس دارىگەردىڭ ورىنباسارى ءاليا تورەشيەۆا.