زاڭ بارىنە ورتاق.
ق ر مادەنيەت جانە اقپارات ءمينيسترى ايدا بالايەۆا الەۋمەتتىك جەلى ارقىلى وتاندىق ونەر وكىلدەرىنىڭ قوعامدىق ءتارتىپتى بۇزۋلارىنا قاتىستى پىكىر ءبىلدىردى، دەپ حابارلايدى Almaty-akshamy.kz
مينيستر سوڭعى كەزدە مادەنيەت سالاسىنداعى بەلگىلى ازاماتتارعا قاتىستى جاعىمسىز وقيعالار، كەيدە ءتىپتى زاڭسىز ارەكەتتەر جيىلەپ كەتكەنىن ايتقان. وسىعان بايلانىستى قوعامدى قارىشتاپ وسىرەتىن دە، تۇقىرتىپ وشىرەتىن دە – مادەنيەت ەكەنىن ەسكەرتكەن.
«مادەنيەت تەك ونەر مەن ءبىلىم، وزات تالعام پەن تازالىك ەمەس. بۇل، ەڭ الدىمەن، ادامنىڭ ىشكى رۋحانياتى، حالىقتىڭ وركەنيەتتىك بولمىسى. ەندەشە، سول مادەنيەتتىڭ تۋىن كوتەرىپ، ونەردىڭ تاسىن ورگە دومالاتىپ جۇرگەن ءاربىر مايتالمان - ەلگە ۇلگى، قوعامعا باعدار بولۋى شارت. وكىنىشكە وراي، سوڭعى كەزدە مادەنيەت سالاسىنداعى بەلگىلى ازاماتتارعا قاتىستى جاعىمسىز وقيعالار، كەيدە ءتىپتى زاڭسىز ارەكەتتەر جيىلەپ كەتتى. ارينە، جەكە-دارا ادام رەتىندە، قاراپايىم ازامات رەتىندە كىمگە بولسا دا پەندەشىلىك ءتان قاسيەت. ادام بولعان سوڭ قاتەلەسۋىڭ مۇمكىن، ءبىراق ونىڭ ارتى زاڭدى اتتاۋعا بارماۋى ءتيىس»، دەيدى مينيستر.
ءوزىن ناعىز “مادەنيەت قايراتكەرىمىن” دەيتىن جان ءۇشىن تانىمالدىق زاڭسىزدىققا جول بەرەتىن قۇدىرەت ەمەس دەگەن پىكىرىن دە بىلدىرگەن. ولاردىڭ قاشاندا ۇلت مادەنيەتى دامۋىنىڭ قوزعاۋشى كۇشى سانالاتىنىن اتاپ وتكەن مينيستر ونەر مايتالماندارىنىڭ كوپكە ىقپالى تەك ونەگە، ناسيحات، جاقسىلىققا ارقاۋ بولۋى ءتيىس ەكەنىن ەسكە سالعان.
“مادەنيەت قايراتكەرلەرى زاڭ مەن ۇرپاق الدىنداعى وسىناۋ ۇلكەن جاۋاپكەرشىلىگىن ءتۇسىنۋى كەرەك. بۇل مەملەكەت باسشىسىنىڭ بارشا قازاقستاندىقتاردان تالاپ ەتىپ وتىرعان بىرەگەي ۇندەۋى. لاۋازىمىنا، تانىمالدىلىعىنا، قوعامداعى ورنىنا قاراماستان، زاڭ بارىنە ورتاق.
ال مەملەكەت وسى قاعيدانىڭ مۇلتىكسىز ورىندالۋىن قامتاماسىز ەتەتىن بولادى، دەگەن ا.بالايەۆا بارشا ونەر ادامدارىن ۇلى ابايدان بەرى كەلە جاتقان قوعامداعى ناداندىقپەن كۇرەستىڭ الدىڭعى شەبىندە مادەنيەت مايتالماندارى ءجۇرۋى ءتيىس ەكەنىن ۇمىتپاۋعا شاقىردى.