جالپىعا بىردەي دەكلاراسيالاۋ شەڭبەرىندە دەكلاراسيالاردى تاپسىرۋ مەرزىمى اياقتالۋعا جاقىن، دەپ حابارلايدى مەملەكەتتىك كىرىستەر كوميتەتىنىڭ باسپا ءسوز قىزمەتى.
«مەن 250.00 نىسانداعى دەكلاراسياعا (جەكە تۇلعانىڭ اكتيۆتەرى مەن مىندەتتەمەلەرى تۋرالى دەكلاراسيا) اقپاراتتى قاتە ەنگىزدىم، دەرەكتەردى قالاي قايتارۋعا نەمەسە تۇزەتۋگە بولادى؟» وسى ساۋال جەكە تۇلعالاردان ءجيى تۇسەتىن بولعان. بۇل رەتتە، كوميتەت جاۋابى كەلەسىدەي:
«دەكلاراسيانى 250.00 ەسەپتىلىك نىسانىن «سالىق تولەۋشىنىڭ كابينەتى» ارقىلى («سالىق وتىنىشتەرى» ءبولىمى، بۇدان ءارى «سالىق ەسەپتىلىگىن كەرى قايتارىپ الۋ تۋرالى ءوتىنىش»)؛ Egov پورتالى («كەدەن جانە سالىقتار» ءبولىمى، «سالىق سالۋ» بولىمشەسى، «دەكلاراسيانى كەرى قايتارىپ الۋ» قىزمەتى) ارقىلى كەرى قايتارۋعا نەمەسە تۇزەتۋگە بولادى.
دەكلاراسيانى تولىعىمەن كەرى قايتارۋ كەلەسى جاعدايلاردا جۇزەگە اسىرىلادى:
- مەرزىمى ياعني دەكلاراسيا تاپسىرىلعان ەسەپتى جىلى دۇرىس كورسەتىلمەگەن بولسا؛
- دەكلاراسيانى تاپسىرۋ بويىنشا ءىس جۇزىندە ەشقانداي مىندەتتەمە جوق بولسا.
ەگەر ءسىز دەكلاراسيادا قاتە جىبەرىپ، سالىق ورگانىنىڭ كودىن، رەزيدەنتتىك مارتەبەسىن نەمەسە سالىق ەسەپتىلىگىنىڭ ءتۇرىن دۇرىس ەمەس كورسەتكەن بولساڭىز، وندا تۇزەتۋ ءادىسى بويىنشا دەكلاراسيا كەرى قايتارىپ الىنادى (دەكلاراسيا جۇيەدە قالادى جانە ونى تابىستاۋ كۇنى وزگەرمەيدى).
باسقا جاعدايلاردا، ياعني سانداردا قاتە جىبەرگەن مالىمەتتەردى (كىرىستەر، قولما-قول اقشا، جىلجىمالى/جىلجىمايتىن مۇلىك جانە قازاقستان رەسپۋبليكاسىنان تىسقارى جەرلەردەگى بانكتىك شوتتارداعى اقشا جانە ت.ب. تۋرالى) تولىق كورسەتپەگەن بولساڭىز، ايىرماشىلىقتىڭ سوماسىن نەمەسە كورسەتىلمەگەن اقپاراتتى «قوسىمشا» دەكلاراسيانى تابىستاۋ ارقىلى تۇزەتە الاسىز».