H توبىندا پورتۋگاليا مەن ۋرۋگۆاي كوماندالارى كۇش سىناستى
قاتاردا فۋتبولدان ءوتىپ جاتقان الەم چەمپيوناتىندا H توبىندا پورتۋگاليا مەن ۋرۋگۆاي كوماندالارى كۇش سىناستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل توپتا ءبىرىنشى تۋردا پورتۋگاليالىقتار تارتىستى ماچتا گانانى 3:2 ەسەبىمەن ۇتسا، ۋرۋگۆاي وڭتۇستىك كورەيامەن تەڭ ويناعان ەدى.
ەكىنشى تۋردا گانا وڭتۇستىككورەيالىقتاردى 3:2 ەسەبىمەن تىزە بۇكتىرىپ، پورتۋگاليانى قۋىپ جەتتى. دەگەنمەن پورتۋگاليالىقتار ۋرۋگايدى جەڭسە، پلەي-وفقا شىعاتىن ەدى.
وسىدان ءتورت جىل بۇرىن رەسەيدە وتكەن چەمپيوناتتا 1/8 فينالدا قوس كوماندا كەزدەسىپ، ۋرۋگۆايلىقتار 2:1 ەسەبىمەن ۇتىپ كەتكەن بولاتىن. سوندا ەدينسون كاۆاني قوس گولدىڭ اۆتورى اتانسا، پورتۋگاليادان پەپە مەرگەندىگىمەن كوزگە تۇسكەن ەدى. سول ويىندا كريشتيانۋ رونالدۋ گول سوعا الماي، قاپى كەتكەن-دى.
بۇل جولى ءبىرىنشى تايمدا باستاپقىدا پورتۋگاليالىقتار دوپقا كوبىرەك يەلىك ەتكەنىمەن، ەشتەڭە تىندىرا المادى. ەسەسىنە 32-مينۋتتا ۋرۋگۆايلىق رودريگو بەنتانكۋر قوس قورعاۋشىنىڭ ورتاسىنان سىتىلىپ شىعىپ، قاقپاشى ديوگۋ كوشتامەن بەتپە-بەت كەلدى. تەك ەرتە ۇمتىلىپ ۇلگەرگەن د.كوشتا كومانداسىن گولدان امان الىپ قالدى.
ەكىنشى كەزەڭدە 54-مينۋتتا سول قاپتالدان برۋنۋ فەرناندەشتىڭ كريشتيانۋ رونالدۋعا قاراي اسىرعان دوبى قاقپادان ءبىر شىقتى – 1:0.
بۇدان كەيىن ۋرۋگۆايلىقتار تارازى باسىن تەڭەستىرۋ ءۇشىن بارىن سالدى. شابۋىلشىلار لۋيس سۋارەس پەن ماكسي گومەس الاڭعا تىڭنان قوسىلدى. سول بويدا 75-مينۋتتا فاكۋندو پەليستريدەن پاس العان م.گومەس قاقىراتا سوققان دوپ قاقپا جاقتاۋىنان كەرى قايتتى.
ماچتىڭ اياقتالۋىنا ساناۋلى مينۋتتار قالعاندا، برۋنۋ فەرناندەش العا ۇمتىلعاندا، ۋرۋگۆايلىق قورعاۋشى حوسە ماريا حيمەنەس قولمەن وينادى. 93-مينۋتتا ب.فەرناندەش 11 مەترلىك پەنالتيدەن ءمۇلت كەتكەن جوق – 2:0. بۇدان سوڭ دا پورتۋگاليالىقتاردىڭ ەسەپتى ۇلعايتىنداي مۇمكىندىكتەرى بولدى.
وسىلايشا، H توبىندا ۋرۋگۆايدى 2:0 ەسەبىمەن تىزە بۇكتىرگەن پورتۋگاليا التى ۇپاي جيناپ، 1/8 فينالعا جولداما الدى. گانادا ءۇش، ۋرۋگۆاي مەن وڭتۇستىك كورەيادا بىر-بىردەن ۇپاي بار. 2 جەلتوقسان كۇنى گانا – ۋرۋگۆاي، وڭتۇستىك كورەيا – پورتۋگاليا قۇرامالارى ءوزارا كەزدەسەدى.
بۇعان دەيىن فرانسيا مەن برازيليا قۇرامالارى مەرزىمىنەن بۇرىن پلەي-وفف كەزەڭىنە شىققان ەدى.
سونىمەن، قاتارداعى دۇنيەجۇزىلىك دودادا ەكىنشى تۋر ويىندارى مارەسىنە جەتتى.