قاتاردا ءوتىپ جاتقان فۋتبولدان 2022 جىلعى الەم چەمپيوناتىنىڭ س توبىندا ارگەنتينا قۇراماسى مەكسيكادان باسىم ءتۇستى، دەپ حابارلايدى Almaty-akshamy.kz Inform.kz-كە سىلتەمە جاساپ.
وتكەن تۋردا ارگەنتينا ساۋد ارابياسىنان جەڭىلىپ قالعان ەدى. سوندىقتان بۇگىن جەڭىسكە جەتپەسە، جارىستى جالعاستىرۋ مۇمكىندىگىنەن ايىرىلىپ قالاتىن. سوندىقتان لەونەل مەسسي باستاعان فۋتبولشىلار مەكسيكانىڭ وسال تۇسىن تابۋعا بار كۇشىن سالاتىنى بەلگىلى بولدى.
كەزدەسۋ بارىسىندا ءدال وسىنداي جاعداي كورىنىس بەردى. العاشقى مينۋتتان العا ۇمتىلعان ارگەنتينالىقتار مەكسيكا قاقپاشىسى گيلەرمو وچوانىڭ وسال تۇسىن تابۋعا تىرىستى. ارگەنتينا شابۋىلىنا لايىقتى توتەپ بەرە بىلگەن مەكسيكالىقتار قولايلى ساتتە العا قاراي ۇمتىلدى. دەگەنمەن ءبىرىنشى كەزەڭدە تابلوداعى ەسەپكە وزگەرىس ەنگەن جوق.
ەكىنشى كەزەڭدە ارگەنتينالىق فۋتبولشىلار ەسەپتى اشۋعا كۇش سالدى. دەسە دە ءبىراز ۋاقىتقا دەيىن دەگەنىنە جەتە العان جوق. ويىننىڭ 64-مينۋتىندا لەونەل مەسسي الىستان تەپكەن دوبىن قاقپا تورىندا تۋلاتتى. وسىلايشا ول ءوزىنىڭ قۇراماسىنىڭ كوشباسشىسى ەكەنىن تاعى ءبىر مارتە دالەلدەدى. قيىن ساتتە جەڭىسكە جەتەلەيتىنىن اڭعارتتى. ول 87-مينۋتتا قۇراماداعى ارىپتەسى ەنسو فەرناندەسكە پاس شىعارىپ، سوڭعىسى ونى گولعا اينالدىردى.
وسىلايشا ارگەنتينا قارسىلاسىنان 2:0 ەسەبىمەن باسىم ءتۇسىپ، العاشقى جەڭىسىنە قول جەتكىزدى.