قاسىم-جومارت توقايەۆ سەسسيا قاتىسۋشىلارىنا ءىلتيپات بىلدىرە وتىرىپ، جيىندى جوعارى دەڭگەيدە ۇيىمداستىرعانى ءۇشىن بەلارۋس تاراپىنا جانە الەكساندر لۋكاشەنكوعا ريزاشىلىق ءبىلدىردى. پرەزيدەنت 2024 جىلدىڭ 1 قاڭتارىنان باستاپ ۇقشۇ-عا ءتوراعالىق ەتۋ مىندەتى قازاقستان رەسپۋبليكاسىنا وتەتىنىن مالىمدەدى. وسىعان وراي مەملەكەت باسشىسى قازاقستان ءتوراعالىعى كەزىندە ۇيىم قىزمەتى بويىنشا ەرەكشە نازار اۋدارۋدى قاجەت ەتەتىن ءبىرقاتار باسىم باعىتتى ۇسىندى.
– ءبىرىنشى، ۇقشۇ-نىڭ قاۋىپسىزدىك سالاسىندا مۇددەلى ەلدەرمەن جانە حالىقارالىق ۇيىمدارمەن ىنتىماقتاستىق ورناتۋ. بىرىككەن ۇلتتار ۇيىمىمەن جانە ونىڭ قۇرىلىمدارىمەن ارادا قالىپتاسقان ىقپالداستىق دەڭگەيىن ساقتاۋعا باسا ءمان بەرۋدى ۇسىنامىز. بۇل جۇمىس 2010 جىلدىڭ 18 ناۋرىزىندا ۇقشۇ مەن بۇۇ حاتشىلىقتارى اراسىندا قول قويىلعان ىنتىماقتاستىق تۋرالى بىرلەسكەن دەكلاراسيا نەگىزىندە جۇرگىزىلەدى. تمد مەن شىۇ اراسىنداعى ىنتىماقتاستىقتى ودان ءارى تەرەڭدەتۋدى قۇپتايمىز. «ۇقشۇ-نىڭ تمد-مەن جانە شىۇ-مەن ىنتىماقتاستىعىن نىعايتۋ جونىندەگى پراكتيكالىق شارالار» اتتى قۇجاتتا ونىڭ ناقتى قادامدارى ايقىندالعان، – دەدى قاسىم-جومارت توقايەۆ.
اسكەري ىنتىماقتاستىق ماسەلەلەرى بويىنشا قارىم-قاتىناس ۇيىم قىزمەتىنىڭ ەكىنشى ماڭىزدى باعىتى رەتىندە ۇسىنىلدى. قازاقستان پرەزيدەنتىنىڭ پىكىرىنشە، ۇقشۇ ۇجىمدىق كۇشتەرىن جەدەل ارەكەت ەتۋ ماسەلەلەرىنە قاتىستى نورماتيۆتىك-قۇقىقتىق بازانى جەتىلدىرۋ قاجەت.
– بۇل كونتينگەنتتىڭ كەدەرگىسىز ءارى ەش جەرگە ايالداماي قوزعالۋىنا، اسكەري اۆياسيانىڭ ۇشۋىنا جانە تاعى دا باسقا اسپەكتىلەرگە قاتىستى. سونىمەن قاتار اسكەري كادرلاردى دايارلاۋ جۇيەسىن جانە ۇقشۇ-عا مۇشە مەملەكەتتەردىڭ اسكەري-عىلىمي قۋاتىن دامىتۋدى جالعاستىرعان ءجون. ۇيىمنىڭ بىتىمگەرشىلىك الەۋەتىن ارتتىرۋعا ايرىقشا ءمان بەرۋ ۇسىنىلادى. بۇل رەتتە ۇقشۇ باس حاتشىسىنىڭ بىتىمگەرشىلىك ماسەلەلەرى جونىندەگى ارنايى وكىلىنىڭ قىزمەتى زور ءرول اتقارادى، – دەدى مەملەكەت باسشىسى.
قاسىم-جومارت توقايەۆ ءوز سوزىندە حالىقارالىق تەرروريزم مەن ەكسترەميزمگە قارسى ءىس-قيمىل باعىتىنداعى ىنتىماقتاستىقتى دامىتۋ ءىسىن تاعى ءبىر باسىمدىق رەتىندە اتادى مەملەكەت باسشىسىنىڭ ايتۋىنشا، ۇجىمدىق قاۋىپسىزدىك جۇيەسىنىڭ تەرروريزمگە قارسى قىزمەتىنە ءجىتى نازار اۋدارىلادى.
– لاڭكەستىك توپتارعا قوسىلۋدى جوسپارلاپ جۇرگەن ازاماتتارىمىزدىڭ ەلدەن تىسقارى شىعىپ كەتۋىنە جول بەرمەۋ ءۇشىن بىرلەسكەن جۇمىستى جالعاستىرعان ءجون. تەرروريزمگە جانە ەكسترەميزمگە قاتىسى بار ادامداردى ىزدەۋ، ۇستاۋ جانە ەكستراديسيالاۋ تەتىكتەرىن ىسكە قوسۋ ماڭىزدى. ۇقشۇ قاۋىپسىزدىك كەڭەسى حاتشىلارىنىڭ كوميتەتى جانىنداعى تەرروريزم مەن ەكسترەميزمگە قارسى كۇرەس ماسەلەلەرىمەن اينالىساتىن ساراپشىلاردىڭ جۇمىس توبىن جانداندىرۋدى ۇسىنامىز، – دەدى مەملەكەت باسشىسى.
پرەزيدەنتتىڭ ايتۋىنشا، ۇيىم ەسىرتكى جانە پسيحوتروپتى زاتتاردىڭ زاڭسىز اينالىمىنا دا قارسى كۇرەس جۇرگىزۋگە ءتيىس.
– ۇقشۇ-عا مۇشە ەلدەردىڭ كەڭىستىگىن وسى ءقاۋىپتى زاتتىڭ ەنۋىنەن قورعاۋ ءۇشىن بىرلەسكەن ءىس-شارالاردىڭ تيىمدىلىگىن ارتتىرۋ قاجەت. جۇمىس رەتىن بارلىق وزەكتى فاكتوردى، سونىڭ ىشىندە سينتەتيكالىق ەسىرتكىنىڭ تارالۋ اياسى كەڭەيە تۇسكەنىن ەسكەرە وتىرىپ ۇيىمداستىرۋ كەرەك. ەسىرتكىنىڭ زاڭسىز اينالىمىنا قارسى كۇرەس جۇرگىزەتىن قۇزىرەتتى ورگاندار جەتەكشىلەرىنەن قۇرالعان ۇيلەستىرۋ كەڭەسى سياقتى مەحانيزم ماڭىزدى ءرول اتقارادى، – دەدى مەملەكەت باسشىسى.
پرەزيدەنت قارۋ-جاراقتىڭ زاڭسىز اينالىمىمەن جانە ترانسۇلتتىق ۇيىمداسقان قىلمىستىق توپتارمەن كۇرەسۋدى، توتەنشە جاعدايلاردىڭ الدىن الۋ جانە ونىڭ سالدارىن جويۋ ماسەلەلەرى بويىنشا ىنتىماقتاستىقتى نىعايتۋدى، اقپاراتتىق تەحنولوگيا سالاسىنداعى قىلمىستارعا قارسى ءىس-قيمىلدى ورتاق جۇمىستىڭ ماڭىزدى باعىتتارى دەپ سانايدى.
– قازىرگى جاعدايدا قاۋىپ-قاتەردىڭ سيپاتى مەن كيبەر قىلمىسكەرلەر قولداناتىن قارۋ تۇرلەرى دە تەز وزگەرىپ جاتىر. مۇنى ءبىزدىڭ نەگىزگى قۇرالىمىز – ۇقشۇ-نىڭ اقپاراتتىق تەحنولوگيا سالاسىنداعى قىلمىستارعا قارسى ءىس-قيمىل جونىندەگى «پروكسي» وپەراسياسىن ىسكە اسىرۋ كەزىندە ەسكەرۋ كەرەك دەپ سانايمىز، – دەدى قازاقستان پرەزيدەنتى.
قاسىم-جومارت توقايەۆ قازاقستاننىڭ ءتوراعالىق ەتۋ كەزەڭىندە جۇزەگە اسىرۋ ءۇشىن ايقىندالعان باسىمدىقتار جۋىق ارادا ۇقشۇ-عا مۇشە مەملەكەتتەرگە جولداناتىنىن ايتتى. مەملەكەت باسشىسى ۇيىمعا مۇشە ەلدەردىڭ بىرلەسكەن كۇش-جىگەرىنىڭ ارقاسىندا ۇجىمدىق قاۋىپسىزدىك جۇيەسىن نىعايتۋ جانە ونى ودان ءارى دامىتۋ ءۇشىن كەشەندى جۇمىستار جالعاسا بەرەتىنىنە سەنىم ءبىلدىردى.
سەسسيا قورىتىندىسى بويىنشا ءبىرقاتار قۇجات قابىلداندى