ق ر پرەزيدەنتى قاسىم-جومارت توقايەۆ ساۋد ارابياسىنىڭ ىسكەر توپتار وكىلدەرىمەن وتكەن ينۆەستيسيالىق دوڭگەلەك ۇستەلگە قاتىستى. بۇل تۋرالى Almaty-akshamy.kz Inform.kz-كە سىلتەمە جاساپ حابارلادى.
پرەزيدەنت جيىنعا قاتىسۋشىلارعا ءىلتيپات بىلدىرە وتىرىپ، مەملەكەتتەرىمىزدىڭ كەلەشەك ەكونوميكالىق دامۋعا دەگەن كوزقاراستارى ۇقساس ەكەنىن اتاپ ءوتتى.
– «Saudi Vision-2030» باعدارلاماسى مەن ءبىزدىڭ «قازاقستان-2050» ستراتەگياسى ەكونوميكانى ءارتاراپتاندىرۋ، شيكىزاتقا تاۋەلدىلىكتى تومەندەتۋ، ادامي كاپيتالعا ينۆەستيسيا سالۋ، تۇپتەپ كەلگەندە، جوعارى دامىعان ەلدەردىڭ قاتارىنا كىرۋ ارقىلى ۇلتتىق دامۋعا قول جەتكىزۋدى كوزدەيدى، – دەدى مەملەكەت باسشىسى.
پرەزيدەنت ساۋد كاسىپكەرلەرىنە قازاقستاننىڭ ەكونوميكالىق جەتىستىكتەرى تۋرالى مالىمەت بەردى.
– تاۋەلسىزدىك جىلدارى قازاقستاننىڭ ىشكى جالپى ءونىمى 17 ەسە ءوستى. بۇگىندە قازاقستان ەكونوميكاسى ورتالىق ازياداعى بارلىق وزگە ەلدەر ەكونوميكاسىنىڭ جيىنتىق كولەمىنەن اسىپ تۇسەدى. ورتالىق ازياداعى تاۋار اينالىمىنىڭ 60 پايىزعا جۋىعى قازاقستانعا تيەسىلى. ەلىمىزدىڭ حالىقارالىق رەزەرۆى – 90 ميلليارد دوللار جانە تمد بويىنشا جان باسىنا شاققاندا ەڭ جوعارىسى سانالادى. شەتەلدىك ينۆەستورلار ەلىمىزدىڭ ەكونوميكاسىنا 380 ميلليارد دوللاردان استام قارجى قۇيدى. بۇل ورتالىق ازيا ايماعىنا سالىنعان جالپى ينۆەستيسيانىڭ 70 پايىزىن قۇرايدى، – دەدى قاسىم-جومارت توقايەۆ.
مەملەكەت باسشىسى ىنتىماقتاستىقتى كەڭەيتۋدىڭ مەيلىنشە پەرسپەكتيۆتى سالالارىن بەلگىلەپ بەردى.
– ءبىز جۇرگىزگەن تالداۋعا سايكەس قازاقستان ماشينا جاساۋ، شويىن جانە بولات ءوندىرىسى، سونداي-اق تاماق ونەركاسىبى مەن اۋىل شارۋاشىلىعى سياقتى سالالار بويىنشا قۇنى شامامەن جىلىنا 400 ميلليون دوللار بولاتىن شيكىزات تاۋارلارىنىڭ 100-دەن استام ءتۇرىن ۇسىنا الادى، –دەدى پرەزيدەنت. قاسىم-جومارت توقايەۆ جۇڭگو، قازاقستان، ازەربايجان، گرۋزيا جانە تۇركيا اراسىن جالعاستىراتىن كولىك-ترانزيت جانە لوگيستيكالىق مۇمكىندىكتەردى، سونىڭ ىشىندە ترانسكاسپيي باعدارىن ءارتاراپتاندىرۋدى جانە كەڭەيتۋدى ەكىنشى ماڭىزدى باعىت رەتىندە اتاپ ءوتتى. ونىڭ پىكىرىنشە، ىنتىماقتاستىقتىڭ مول الەۋەتىن ەكونوميكانىڭ ناقتى سەكتورىندا دا پايدالانۋعا بولادى.
– قازاقستان الەمدە ۆولفرام قورى بويىنشا 1-ورىن، ۋران مەن حروم بويىنشا 2-ورىن الادى، ال مارگانەس، كۇمىس، مىرىش، قورعاسىن بايلىعى بويىنشا العاشقى بەستىككە كىرەدى. بۇل قورلاردى بارلاپ، زەرتتەۋ كەرەك. قارقىندى دامىپ كەلە جاتقان جۇڭگو مەن وڭتۇستىك ازيا نارىعىنا جاقىندىعىمىزدى ەسكەرە وتىرىپ، ينۆەستيسيا سالۋعا، شىن مانىندە، بۇل جاقسى مۇمكىندىك. بۇگىن ءبىز بارلاۋ جانە ازىرلەمە جۇمىستارى ءۇشىن باعالى جانە ءتۇستى مەتالدىڭ 60-تان استام كەن ورنىن ۇسىنا الامىز، – دەدى مەملەكەت باسشىسى.
قازاقستان مەن ساۋد ارابياسىنىڭ مۇناي حيمياسى، اتوم ەنەرگەتيكاسى، جاسىل سۋتەگى ءوندىرىسى سالالارىن دامىتۋ، عارىشتى زەرتتەۋ جونىندە جانە باسقا دا باعىتتار بويىنشا جوسپارى بار.
– ءبىز كورولدىكتىڭ Saudi Vision-2030 ستراتەگياسى اياسىندا ءوزىنىڭ عارىشتىق باعدارلاماسىن دامىتۋعا دەگەن نيەتىن قولدايمىز. ەلدەرىمىزدىڭ عارىش كەڭىستىگىن زەرتتەۋ جانە بەيبىت ماقساتتا پايدالانۋ سالاسىنداعى ىنتىماقتاستىق ءۇشىن ءتيىستى قۇقىقتىق بازاسى بار. قازاقستاننىڭ اەروعارىش سالاسىن دامىتۋ ءۇشىن تاجىريبەسى دە، الەۋەتى دە جەتكىلىكتى. ءبىزدىڭ كومپانيالارىمىز وسى سالالار بويىنشا ساۋد ارابياسىنىڭ مەملەكەتتىك جانە جەكە كومپانيالارىمەن ءوزارا ىنتىماقتاستىق ورناتۋعا دايىن، – دەدى قاسىم-جومارت توقايەۆ.
پرەزيدەنت وتاندىق اگروسەكتوردىڭ الەۋەتىنە دە توقتالدى.
– قازاقستان ەگىستىك كولەمى بويىنشا جان باسىنا شاققاندا الەمدە ەكىنشى، جايىلىمدىق جەرلەر جونىنەن بەسىنشى ورىن (180 ميلليون گەكتار) الادى. ەلىمىز بيداي وسىرەتىن جانە ۇن وندىرەتىن 10 ءىرى مەملەكەتتىڭ قاتارىنا كىرەدى. ءبىز كورولدىككە جوعارى ساپالى بيداي، ۇن جانە مايلى داقىلداردى تۇراقتى ءارى ۇزاق مەرزىمدى جەتكىزۋشى ەلدەردىڭ ءبىرى بولۋعا دايىنبىز، – دەدى قاسىم-جومارت توقايەۆ.
قاسىم-جومارت توقايەۆ قازاقستاندا ينۆەستورلار ءۇشىن زاماناۋي ينستيتۋسيونالدىق ورتا قالىپتاسقانىن ەسكە سالدى.
– وسى مۇمكىندىكتى پايدالانا وتىرىپ، قازاقستاننىڭ ساۋد ارابياسىمەن اراداعى ەكىجاقتى ىنتىماقتاستىقتى نىعايتۋعا جانە كەڭەيتۋگە بەيىلدى ەكەنىن راستاعىم كەلەدى. بۇگىن وسىندا بۇكىل الەمدە ايتارلىقتاي تابىستارعا قول جەتكىزگەن ساۋد ارابياسىنىڭ ءىرى كومپانيالارىنىڭ باسشىلارى قاتىسىپ وتىر. مەن ءبارىڭىزدى ءوزارا ءتيىمدى نەگىزدە قازاقستاندا بىرلەسە جۇمىس ىستەۋگە شاقىرامىن، – دەدى قازاقستان پرەزيدەنتى.