قاسىم-جومارت توقايەۆ رەسەي پرەزيدەنتىنە كوڭىل ايتۋ جەدەلحاتىن جولدادى

رەسەيدىڭ يجيەۆسك قالاسىنداعى مەكتەپتە ەر ادام قارۋدان وق جاۋدىردى

ق ر پرەزيدەنتى قاسىم-جومارت توقايەۆ يجيەۆسك قالاسىنداعى مەكتەپكە جاسالعان شابۋىل سالدارىنان ادامداردىڭ قازا تابۋىنا بايلانىستى ۆلاديمير پۋتينگە كوڭىل ايتتى. Almaty-akshamy.kz بۇل تۋرالى اقورداعا سىلتەمە جاساپ حابارلايدى.

«رەسەي فەدەراسياسىنىڭ يجيەۆسك قالاسىنداعى №88 مەكتەپكە جاسالعان قارۋلى شابۋىل سالدارىنان ازاماتتاردىڭ، سونىڭ ىشىندە بالالاردىڭ قازا تابۋى تۋرالى قايعىلى حاباردى اۋىر كۇيزەلىسپەن قابىلدادىم. ورنى تولماس قايعىعا ورتاقتاسا وتىرىپ، سىزگە جانە قايتىس بولعانداردىڭ تۋعان-تۋىستارى مەن جاقىندارىنا كوڭىل ايتامىن. سونداي-اق بارلىق زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن»، – دەپ جازىلعان جەدەلحاتتا.

ەسكە سالايىق، كەشە رەسەيدىڭ يجيەۆسك قالاسىنداعى مەكتەپتە ەر ادام قارۋدان وق جاۋدىردى. كەيىن قاسكوي وز-وزىنە قول سالعان.

سوڭعى مالىمەتكە سايكەس، وقيعا سالدارىنان قازا تاپقاندار سانى 13 ادامعا جەتتى. ولاردىڭ اراسىندا 7 بالا بار. 21 ادام جاراقات الدى، ونىڭ 14ء-ى – بالالار.

مەكتەپ يجيەۆسك قالاسىنىڭ ورتالىعىندا قالا اكىمشىلىگى عيماراتىنىڭ جانىندا ورنالاسقان. وندا 982 وقۋشى وقيدى، 80 ءمۇعالىم جۇمىس ىستەيدى.