مەملەكەت باسشىسى قورعانىس ءمينيسترى رۋسلان جاقسىلىقوۆتى قابىلدادى
پرەزيدەنت – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆقا قورعانىس ۆەدومستۆوسىنىڭ بيىلعى اتقارعان قىزمەتى تۋرالى ەسەپ بەرىلدى.
مەملەكەت باسشىسىنا بولىمشەلەردىڭ جاۋىنگەرلىك دايىندىعى، قارۋلى كۇشتەر قاتارىنا كۇزگى شاقىرۋ ناۋقانىنىڭ ناتيجەلەرى، سونداي-اق اسكەري قىزمەتتەگى ءتارتىپ پەن قاۋىپسىزدىكتى نىعايتۋعا، اسكەري قىزمەتشىلەردىڭ الەۋمەتتىك مارتەبەسى مەن جالاقىسىن ارتتىرۋعا باعىتتالعان شارالار جونىندە باياندالدى.
ارميانىڭ جاۋىنگەرلىك الەۋەتىن كەزەڭ-كەزەڭىمەن ارتتىرۋ جانە اسكەردى دايارلاۋدىڭ جاڭا تاسىلدەرىنە كوشۋ ماسەلەلەرىنە ەرەكشە نازار اۋدارىلدى.
رۋسلان جاقسىلىقوۆ مەملەكەتتىك قورعانىس تاپسىرىسىنىڭ ورىندالۋ بارىسى تۋرالى بايانداپ، اسكەردىڭ قارۋ-جاراق پەن تەحنيكانىڭ جاڭا ۇلگىلەرىمەن، اتاپ ايتقاندا، ۇشقىشسىز باسقارىلاتىن اۆياسيالىق جۇيەلەرمەن جانە راديوەلەكتروندىق كۇرەس كەشەندەرىمەن جاراقتاندىرىلىپ جاتقانىن جەتكىزدى. بۇدان بولەك، جاۋىنگەرلىك ماشينالاردى جانە بايلانىس قۇرالدارىن جاڭعىرتۋ، راسيوناليزاتورلىق جۇمىستى جانداندىرۋ، سونداي-اق اسكەري ينفراقۇرىلىمدى دامىتۋ ماسەلەلەرى تالقىلاندى.
قاسىم-جومارت توقايەۆ ەلىمىزدىڭ بىتىمگەرلىك كونتينگەنتىنىڭ بۇۇ اياسىندا گولان جوتالارىندا اتقارىپ جاتقان قىزمەتىنىڭ ماڭىزدى ەكەنىن اتاپ ءوتتى.
كەزدەسۋ سوڭىندا جوعارعى باس قولباسشى قاسىم-جومارت توقايەۆ مينيسترگە وتاندىق قورعانىس كاسىپورىندارىمەن ءوزارا ىقپالداستىقتى جانداندىرۋ، اۋماقتىق قورعانىس پەن ارنايى وپەراسيا كۇشتەرىن دامىتۋ، الەۋمەتتىك-قۇقىقتىق جۇمىستى كۇشەيتۋ جونىندە ناقتى تاپسىرمالار بەردى.