مەملەكەت باسشىسى كولىك-ترانزيت الەۋەتىن دامىتۋ جونىندە كەڭەس وتكىزدى
پرەزيدەنتتىڭ توراعالىعىمەن ەلىمىزدىڭ كولىك-ترانزيتتىك الەۋەتىن دامىتۋ جونىندە كەڭەس ءوتتى. جيىنعا ۇكىمەت باسشىلىعى، سالالىق مينيسترلىكتەر مەن ۆەدومستۆولاردىڭ، ۇلتتىق كومپانيالاردىڭ باسشىلارى قاتىستى، دەپ حابارلايدى اlmaty-akshamy.kz.
قاسىم-جومارت توقايەۆ كولىك-لوگيستيكا سالاسىنىڭ قازاقستان ەكونوميكاسىندا ەرەكشە ءرول اتقاراتىنىن اتاپ ءوتتى. ونىڭ ايتۋىنشا، وڭىرلەردىڭ ءوزارا قارىم-قاتىناسىن جانداندىرۋ ءۇشىن بۇل سالانىڭ ماڭىزى زور. دەگەنمەن گەوساياسي جاعداي مەن سانكسيالىق تەكەتىرەس ءداستۇرلى كولىك-لوگيستيكا جەلىسىن وزگەرىسكە ۇشىراتتى.
جيىن بارىسىندا قارىم-قاتىناستار مەن جۇك جەتكىزەتىن بالاما باعىتتاردى، سونداي-اق تاسىمالداۋ ءىسىن ءارتاراپتاندىرۋدى پىسىقتاۋ قاجەتتىگى ايتىلدى.
پرەزيدەنتتىڭ پىكىرىنشە، وتاندىق ءونىمنىڭ ەكسپورتقا ءقاۋىپسىز ءارى ۇزدىكسىز شىعارىلۋىن قامتاماسىز ەتۋ ءۇشىن كەشەندى شارالار قابىلداۋ قاجەت. مەملەكەت باسشىسى ەلىمىزدىڭ ورتالىق ازيا ايماعىنداعى كوشباسشىلىعىن ساقتاپ، قازاقستاندى سەنىمدى ترانزيتتىك حاب رەتىندە دامىتۋ كەرەك ەكەنىن ايتتى. وسى ماقساتتا بالاما تەمىرجول باعىتتارىن قالىپتاستىرۋ قاجەت. بۇل جەردە دوستىق – مويىنتى، باقتى – اياگوز، ماقتاارال – داربازا جوبالارىن جۇزەگە اسىرۋ، الماتى قالاسىن اينالىپ وتەتىن تەمىرجول جەلىسىن سالۋ جونىندە ءسوز بولىپ وتىر.
قاسىم-جومارت توقايەۆ تەمىرجول پاركىنىڭ جۇمىسىن جانداندىرۋ جانە جولدارعا كۇردەلى جوندەۋ جۇرگىزۋ جونىندە شارالار قابىلداۋدى تاپسىردى.
– وتاندىق تەمىرجول سالاسىندا ماشينا جاساۋ ءىسىن دامىتۋعا باسا ءمان بەرۋ قاجەت. ونىڭ العىشارتتارى بار. قازاقستاندىق وندىرۋشىلەردى بەلسەندى تۇردە قولداۋ كەرەك، – دەدى مەملەكەت باسشىسى.
قاسىم-جومارت توقايەۆ «قازاقستان تەمىر جولى» ۇلتتىق كومپانياسىن تولىقتاي جاڭعىرتۋ قاجەت دەپ ەسەپتەيدى.
– قازاقستان تەمىرجولىن ۇلتتىق كولىك-لوگيستيكا كومپانياسى رەتىندە ترانسفورماسيالايتىن ۋاقىت كەلدى دەپ ويلايمىن. بۇل قتج-نىڭ مانداتى مەن مىندەتتەرىن كەڭەيتۋگە، كومپانياعا ەلىمىزدىڭ كولىك-ترانزيت الەۋەتىن دامىتۋ جۇمىستارىن كەشەندى تۇردە جۇرگىزۋگە مۇمكىندىك بەرەدى، – دەدى پرەزيدەنت.
پرەزيدەنت تەڭىز ارقىلى تاسىمالداۋ ءىسىن دامىتۋعا ەرەكشە نازار اۋداردى.
– قازاقستان تەڭىز ارقىلى تاسىمالداۋ الەۋەتىن تولىق پايدالانعان ەمەس. ءقازىر زامان باسقا. ۇكىمەتكە پورتتارىمىزدى كاسپيي تەڭىزىنىڭ جەتەكشى حابتارىنىڭ بىرىنە اينالدىرا وتىرىپ، ترانسفورماسيالاۋ جونىندە ستراتەگيالىق مىندەت جۇكتەدىم. تەڭىز فلوتىن نىعايتىپ، اقتاۋ پورتىندا كونتەينەرلىك حاب قۇرۋ قاجەت دەگەن ۇسىنىسپەن تولىق كەلىسەمىن، – دەدى مەملەكەت باسشىسى.
قاسىم-جومارت توقايەۆ مۇناي تاسىمالداۋ ءىسىن ءارتاراپتاندىرۋدى تاعى ءبىر ماڭىزدى مىندەت رەتىندە اتاپ ءوتتى.
– ترانسكاسپيي باعدارى باسىم باعىت سانالادى. «قازمۇنايگازعا» ونى جۇزەگە اسىرۋدىڭ وڭتايلى نۇسقاسىن، سونىڭ ىشىندە تەڭىز جوباسىنىڭ ينۆەستورلارىن تارتۋ مۇمكىندىگىن پىسىقتاۋدى تاپسىرامىن. ۇكىمەت «سامۇرىق-قازىنامەن» بىرلەسىپ، اتىراۋ – كەڭقياق جانە كەڭقياق – قۇمكول مۇناي قۇبىرلارىنىڭ قۋاتىن ارتتىرۋ جونىندە شارالار قابىلداۋى قاجەت، – دەدى پرەزيدەنت.
اۆتوجول ينفراقۇرىلىمىن دامىتۋ ماسەلەسى دە ماڭىزدى سالالاردىڭ ءبىرى. مەملەكەت باسشىسىنىڭ ايتۋىنشا، ەڭ الدىمەن، قۇرىلىسى باستالعان ماگيسترالدى باعىتتارداعى (اقتوبە – قاندىاعاش – ماقات، اتىراۋ – استراحان، الماتى – قاراعاندى جانە تالدىقورعان – وسكەمەن) قايتا جاڭارتۋ جۇمىستارىن ۋاقىتىلى ءارى ساپالى اياقتاۋ قاجەت.
سونىمەن قاتار پرەزيدەنت بيۋدجەت قاراجاتىن ءتيىمدى پايدالانۋ جانە وتاندىق كومپانيالاردى كەڭىنەن تارتۋ قاجەت ەكەنىنە نازار اۋداردى.
– جوبالاردى جۇزەگە اسىرۋ بارىسىندا بيۋدجەتتى بارىنشا ءتيىمدى پايدالانۋ جانە وتاندىق ونىمدەردىڭ كولەمىن ارتتىرۋ باستى قاعيدات بولۋى كەرەك، – دەدى مەملەكەت باسشىسى.
بۇدان بولەك ۇكىمەتكە جىل سوڭىنا دەيىن كەدەندىك راسىمدەۋ ۇدەرىسىن جانە شەكارالىق باقىلاۋدى تولىق اۆتوماتتاندىرۋ تاپسىرىلدى.
جيىن بارىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، ەنەرگەتيكا ءمينيسترى بولات اقشولاقوۆ، «قازاقستان تەمىر جولى» ۇك» اق باسقارما ءتوراعاسى نۇرلان ساۋرانبايەۆ بايانداما جاسادى. سونداي-اق تالقىلاۋعا پرەمەر-مينيستر ءاليحان سمايىلوۆ، پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ، «قازمۇنايگاز» ۇك» اق باسقارما ءتوراعاسى ماعزۇم مىرزاعالييەۆ قاتىستى.