قازاقستان پرەزيدەنتى ءححى عاسىرداعى تاتۋ كورشىلىك جانە وداقتاستىق تۋرالى شارتتىڭ 10 جىلدىعى قارساڭىندا ءوتىپ جاتقان رەسەي پرەزيدەنتىنىڭ رەسمي ساپارىنىڭ ءمان-ماڭىزى ايرىقشا ەكەنىن اتاپ ءوتتى، دەپ حابارلايدى اlmaty-akshamy.kz.
– رەسەي – قازاقستاننىڭ ستراتەگيالىق سەرىكتەسى جانە وداقتاسى. ورتاق تاريحقا، بەرىك دوستىققا، ءوزارا قۇرمەت پەن سەنىمنىڭ مىزعىماس قۇندىلىقتارىنا سۇيەنە وتىرىپ، ءبىز كوپتەگەن سالا بويىنشا ءوزارا مۇددەنى جۇزەگە اسىرۋدىڭ ايقىن دالەلى سانالاتىن مەملەكەتارالىق قاتىناستى جولعا قويدىق. وسى مۇمكىندىكتى پايدالانا وتىرىپ، قازاقستان رەسەيمەن اراداعى جان-جاقتى ىنتىماقتاستىقتى ودان ءارى نىعايتۋدى كوزدەيتىن ستراتەگيالىق باعىتقا بەيىلدى ەكەنىن راستاعىم كەلەدى، – دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، كەلىسسوزدەر بارىسىندا ساۋدا-ەكونوميكالىق جانە ينۆەستيسيالىق ىقپالداستىققا ەرەكشە ءمان بەرىلدى.
– رەسەي قازاقستاننىڭ ءىرى ساۋدا-ەكونوميكالىق سەرىكتەسى مارتەبەسىن سەنىمدى تۇردە ساقتاپ كەلەدى. سوڭعى ءۇش جىلدا ەلدەرىمىز اراسىنداعى ءوزارا ساۋدا كولەمى 30 پايىزدان استام ءوستى. بىلتىر تاۋار اينالىمى، قازاقستان ستاتيستيكاسى بويىنشا، 27 ميلليارد دوللاردى قۇرادى. بۇل – رەكوردتىق كورسەتكىش. بيىل دا وڭ ديناميكا ساقتالىپ وتىر. سەگىز ايدىڭ قورىتىندىسى بويىنشا ساۋدا-ساتتىق كولەمى 17 ميلليارد دوللارعا جەتتى. جالپى، ءوزارا تاۋار اينالىمىن ودان ءارى ارتتىرۋ ءۇشىن زور مۇمكىندىك بار. وسى ورايدا ەكى ەلدىڭ ىسكەر توپتارى اراسىنداعى بايلانىستاردىڭ ايتارلىقتاي جاندانعانى بايقالادى. رەسەيلىك كومپانيالار قازاقستان ەكونوميكاسىنداعى جەتەكشى ينۆەستورلاردىڭ بەستىگىنە كىرەدى. ولار جالپى 20 ميلليارد دوللاردان استام ينۆەستيسيا سالدى. وسى جىلدىڭ ءبىرىنشى جارتىجىلدىعىندا عانا قازاقستان ەكونوميكاسىنا تارتىلعان رەسەيلىك ينۆەستيسيا كولەمى ءبىر ميلليارد دوللاردان استى. بۇل وتكەن جىلعى دەڭگەيدەن 20 پايىزعا كوپ. ءوز كەزەگىندە قازاقستاننىڭ رەسەيگە سالعان ينۆەستيسياسىنىڭ كولەمى 6 ميلليارد دوللارعا جەتتى. بۇل ەكىجاقتى پروسەسس ەكەنى قۋانتادى، – دەدى مەملەكەت باسشىسى.