ەكى ەل اراسىنداعى ساۋدا 31 ملرد دوللاردان استى
قاسىم-جومارت توقايەۆ ەڭ اۋەلى مەملەكەتتىك ساپارمەن كەلۋگە شاقىرىپ، قۇرمەتپەن قارسى العانى ءۇشىن قحر ءتوراعاسى سي سزينپينگە شىنايى ريزاشىلىعىن ءبىلدىردى. سونىمەن بىرگە ونى جۇڭگو حالىق رەسپۋبليكاسىنىڭ ءتوراعاسى لاۋازىمىنا قايتا سايلانۋىمەن قۇتتىقتادى، دەپ حابارلايدى Almaty-akshamy.kz اقورداعا سىلتەمە جاساپ.
"قازاقستان ءۇشىن جۇڭگو حالىق رەسپۋبليكاسىنىڭ ورنى – ەرەكشە. ءبىزدىڭ ىنتىماقتاستىعىمىز مىزعىماس دوستىققا جانە ءوزارا قولداۋعا نەگىزدەلگەن. ەكىجاقتى قارىم-قاتىناستى جانداندىرۋ جولىنداعى ماقساتىمىز – ورتاق. ايماقتىق جانە حالىقارالىق قاۋىپسىزدىكتى، ءوزارا ىقپالداستىقتى نىعايتۋدى كوزدەيتىن مۇراتىمىز دا – ءبىر. ءبىز ءۇشىن قىتايمەن ماڭگىلىك ءارى جان-جاقتى ستراتەگيالىق ارىپتەستىكتى ودان ءارى دامىتۋ وتە ماڭىزدى"، – دەدى مەملەكەت باسشىسى.
بۇگىندە جۇڭگو – قازاقستاننىڭ نەگىزگى ساۋدا سەرىكتەستەرىنىڭ ءبىرى. بىلتىرعى قورىتىندى بويىنشا ءوزارا ساۋدا-ساتتىق كولەمى 30 جىلدىڭ ىشىندەگى رەكوردتىق دەڭگەيگە جەتىپ، 31 ملرد دوللاردان استى.
"مۇنداي قارقىنمەن ءبىز جاقىن ارادا تاۋار اينالىمى كورسەتكىشىن 35 ملرد دوللارعا دەيىن جەتكىزۋ ماقساتىنا قول جەتكىزە الامىز دەپ ويلايمىن. سوندىقتان 2030 جىلعا قاراي 40 ملرد دوللارلىق مەجەنى بەلگىلەۋدى ۇسىنامىن. وسى ماقساتقا جەتۋ ءۇشىن ءبىز ءوزارا ساۋدا نومەنكلاتۋراسىن كەڭەيتە الار ەدىك». قازاقستان قىتايعا جىبەرىلەتىن اۋىل شارۋاشىلىعى ونىمدەرىنىڭ ەكسپورتىن كەڭەيتۋگە مۇددەلى. تەك بىلتىر اۋىل شارۋاشىلىعى ونىمدەرىنىڭ ءوزارا ساۋدا-ساتتىق كولەمى 780 ملن دوللاردان استى. قازاقستان بۇرشاق داقىلدارىن، جوعارى ساپالى ءارى ەكولوگيالىق تازا مۇزداتىلعان سيىر جانە قوي ەتىن جەتكىزۋگە دايىن"، دەدى قاسىم-جومارت توقايەۆ.
پرەزيدەنت ەكونوميكالىق الەۋەتتىڭ جۇزەگە اسىرىلۋى كوبىنەسە كولىك-ترانزيت سالاسىنا بايلانىستى ەكەنىن ايتتى.
"بۇل جەردە ءسىزدىڭ اۋقىمى جاعىنان بىرەگەي «ءبىر بەلدەۋ – ءبىر جول» باستاماڭىزدىڭ اياسىنداعى تابىستى ىنتىماقتاستىعىمىزدى ەرەكشە اتاپ وتكىم كەلەدى. وسى جىلدار ارالىعىندا «ءبىر بەلدەۋ – ءبىر جول» جوباسىن بىرلەسىپ جۇزەگە اسىرۋدا ەلەۋلى ناتيجەگە قول جەتكىزىلدى. ەرتەڭ سيان قالاسىنىڭ قۇرعاق پورتىندا لوگيستيكا ورتالىعى ىرگەتاسىنىڭ ونلاين رەجيمدە قالانۋى ءبىزدىڭ كولىك-لوگيستيكا سالاسىنداعى بايلانىستارىمىزدىڭ تاعى ءبىر بەلەسى بولماق. كولىك دالىزدەرىن ءارتاراپتاندىرۋ اياسىندا ترانسكاسپيي حالىقارالىق كولىك باعدارىنىڭ (تحكب) الەۋەتىن بەلسەندى تۇردە پايدالانۋدى ۇسىنامىن"،- دەدى توقايەۆ.