قاسىم-جومارت توقايەۆ جۇمىس ساپارىمەن اتىراۋ وبلىسىنا باردى

قويناۋى قارا التىنعا تولى ايماق.

بۇگىن پرەزيدەنت قاسىم-جومارت توقايەۆتىڭ اتىراۋ وبلىسىنا جۇمىس ساپارى بارىسىندا اتىراۋ وبلىسى جۇرتشىلىعىمەن كەزدەستى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.

«بۇگىن سىزدەرمەن شەجىرەسى باي، قازىناسى مول اتىراۋ جەرىندە كەزدەسىپ وتىرعانىما قۋانىشتىمىن. قويناۋى قارا التىنعا تولى بۇل ايماق ەلىمىزدىڭ ەكونوميكاسىنىڭ دامۋىنا ەلەۋلى ۇلەس قوسۋدا. اق جايىقتىڭ اتىرابى ءاردايىم قازاقستاننىڭ ەكونوميكالىق تىرەگى بولىپ كەلەدى. شىن مانىندە، تاۋەلسىز ەل رەتىندە اياققا نىق تۇرۋىمىزعا اتىراۋ تۇرعىندارىنىڭ ءرولى ماڭىزدى بولدى. بۇگىندە مۇنايدىڭ باعاسى ەداۋىر جوعارى تۇر. وسىدان 20 جىلدان استام ۋاقىت بۇرىن مەن ۇكىمەت باسقارعان كەزدە مۇنايدىڭ باعاسى 10-15 دوللار ەدى. ءىرى كەن ورىندارى يگەرىلمەگەن، زاماناۋي تەحنولوگيا كەلە قويماعان شاق بولاتىن. مۇنايدى ەكسپورتتاۋ جولدارى شەكتەۋلى، وتە قيىن زاماندى باستان وتكەردىك»،- دەدى پرەزيدەنت.

ايماق حالقى ءقازىر دە مەملەكەتىمىزدى نىعايتۋعا، حالىقتىڭ ءال-اۋقاتىن ارتتىرۋعا زور ۇلەس قوسىپ جاتىر.

«سول ءۇشىن وزدەرىڭىزگە شىنايى ريزاشىلىعىمدى بىلدىرەمىن. بۇل وڭىردە مۇنايشىلىق بايىرعى كاسىپكە اينالعان. قازاق مۇنايىنىڭ اتاسى اتانعان سافي وتەبايەۆتىڭ جولىن ءىزباسارلارى لايىقتى جالعاستىرىپ كەلەدى»، - دەدى قاسىم-جومارت كەمەل ۇلى.