بىزدە ساياسي كوزقاراسى ءارتۇرلى پارتيالار بار. پليۋراليزم مەملەكەتتى ەۆوليۋسيالىق جولمەن دامىتۋعا مۇمكىندىك بەرەدى. مەملەكەت باسشىسى قاسىم-جومارت توقايەۆ پارلامەنت سەناتىنىڭ وتىرىسىندا وسىنداي پىكىر ءبىلدىردى، دەپ حابارلايدى اقوردانىڭ باسپا ءسوز قىزمەتى.
«پليۋراليزم مەملەكەتتى ەۆوليۋسيالىق جولمەن دامىتۋعا مۇمكىندىك بەرەدى. بىزدە ساياسي كوزقاراسى ءارتۇرلى پارتيالار بار. كانديداتتاردىڭ ءتۇرلى ماسەلە بويىنشا ۇستانىمدارىنىڭ بىردەي بولماۋى دا زاڭدى قۇبىلىس. ءبىراق، كوزقاراستارى مۇلدە قابىسپايتىن ىمىراسىز قارسىلاستاردىڭ وزىنە ورتاق قۇندىلىقتار بار. ول – ءبىزدىڭ قاسيەتتى وتانىمىز جانە قاستەرلى تاۋەلسىزدىگىمىز. مەن بۇل تۋرالى «تاۋەلسىزدىك بارىنەن قىمبات» اتتى ماقالامدا ايتتىم. ويتكەنى، تاۋەلسىزدىك ءۇشىن كۇرەس كۇندەلىكتى ەڭبەكپەن جانە ەلدىك ساياساتپەن تىعىز بايلانىسىپ جاتىر. بولاشاقتىڭ الدىندا ءبارىمىز بىردەي جاۋاپ بەرەمىز. كەيىنگى ۇرپاق كىمنىڭ ساياسي ۇستانىمى قانداي بولعانىنا ءمان بەرەدى. اعا بۋىننىڭ ولارعا قانداي مەملەكەتتى ميراس ەتكەنىنە قاراپ، بۇگىنگى كۇنىن باعالايتىن بولادى. سوندىقتان، ءبىز ورتاق ماقسات جولىندا بىرىگۋىمىز كەرەك»، - دەدى ق ر پرەزيدەنتى.
ودان بولەك، پرەزيدەنت ساياسي مۇددەگە قاراعاندا مەملەكەتشىلدىك قاسيەت الدەقايدا بيىك تۇرۋ كەرەگىن اتاپ ءوتتى.
«كەز كەلگەن ساياسي مۇددەگە قاراعاندا مەملەكەتشىلدىك قاسيەت الدەقايدا بيىك تۇرۋى ءتيىس. قوعامعا، ەڭ الدىمەن، ءاربىر سوزىنە جانە ىسىنە جاۋاپكەرشىلىكپەن قارايتىن ساياساتكەرلەر قاجەت. سوندا ازاماتتاردىڭ ەلدىك ساياساتقا دەگەن سەنىمى ارتادى. ال، سەنىم – بۇل اسا ماڭىزدى قۇندىلىق. ءبىزدىڭ ەلىمىزگە زاڭ ۇستەمدىگى جانە ازاماتتىق ءتارتىپ اسا قاجەت. باۋىرجان مومىش ۇلى «تارتىپكە باعىنعان قۇل بولمايدى» دەپ ايتقان. زاڭدى سىيلايتىن ەلدىڭ قاشاندا ۇپايى تۇگەل»، - دەدى ول.
سونداي-اق، مەملەكەت باسشىسى قوعامدىق كەلىسىمدى ساقتاۋ ەلىمىزدىڭ ءاربىر ازاماتىنىڭ پەرزەنتتىك پارىزى ەكەنىن ەسكە سالدى.
«شىن مانىندە، تاتۋلىق پەن تۇراقتىلىق ەڭ اسىل قۇندىلىق ەكەنىنە ءبارىمىز كوز جەتكىزدىك. تىنىشتىق بولماسا، باسقا تابىستىڭ ءبارى ءبىر ساتتە قۇردىمعا كەتەتىنىن كوردىك. ءبىز ەل بىرلىگىنىڭ ارقاسىندا بارلىق قيىندىقتى جەڭىپ كەلەمىز. سوندىقتان، باردى باعالاپ، ىرىستى ىنتىماعىمىزدى قورعاۋ – بارىمىزگە ورتاق قاسيەتتى بورىش. ءبىز بىر-بىرىمىزگە قامقور، جاناشىر بولىپ، جاقسىلىققا ۇمتىلۋىمىز كەرەك. قوعامدىق كەلىسىمدى ساقتاۋ مەملەكەتتىك ورگانداردىڭ عانا مىندەتى ەمەس. بۇل – ەلىمىزدىڭ ءاربىر ازاماتىنىڭ پەرزەنتتىك پارىزى. ءبىز نە ىستەسەك تە، ەل مۇددەسى ءۇشىن جاسايمىز. ماقساتىمىز – قازاقستاندى تۇعىرى بەرىك، ەكونوميكاسى قۋاتتى، رۋحى اسقاق، بىرلىگى بەكەم مەملەكەت رەتىندە ۇرپاققا تابىستاۋ. وسى تاريحي مىندەتتى ءبارىمىز بىرگە ابىرويمەن اتقارىپ شىعامىز دەپ سەنەمىن»، - دەپ اتاپ ءوتتى ول.