قاسىم-جومارت توقايەۆ اسقار ءماميندى قابىلدادى

پرەمەر-مينيستر مەملەكەت باسشىسىنا قازاقستاننىڭ ەۋرازيالىق ەكونوميكالىق وداققا ءتوراعالىعىنىڭ باسىم باعىتتارىن ىسكە اسىرۋ بارىسى جونىندە باياندادى.

قازاقستان پرەزيدەنتى قاسىم-جومارت توقايەۆ پرەمەر-مينيستر اسقار ءماميندى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.

قاسىم-جومارت توقايەۆقا ەلىمىزدەگى سانيتارلىق-ەپيدەميولوگيالىق احۋال، الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ بويىنشا قابىلدانىپ جاتقان شارالار، ينۆەستيسيا تارتۋ جانە وزگە دە الەۋمەتتىك-ەكونوميكالىق دامۋ ماسەلەلەرى جونىندە ەسەپ بەرىلدى. 

پرەمەر-مينيستر ەپيدەميولوگيالىق احۋالدىڭ تۇراقتالعانىن جانە COVID-19 ىندەتىن جۇقتىرۋ كورسەتكىشىنىڭ تومەندەگەنىن اتاپ ءوتتى. ونىڭ ايتۋىنشا، سوڭعى ايدا كوروناۆيرۋس جۇقتىرعاندار سانى 2،4 ەسەگە، ستاسيونارلاردا ەم الىپ جاتقاندار 1،4 ەسەگە، امبۋلاتوريالىق جاعدايدا ەمدەلۋشىلەر 1،8 ەسەگە ازايعان.

حالىققا ۆاكسينا سالۋ جونىندەگى جوسپارلى جۇمىستار جالعاسىپ جاتىر. بۇگىنگە دەيىن 8،7 ميلليونعا جۋىق ادام ەكپە العان. 22 قاراشادان باستاپ بۇكىل وڭىردە قايتا ۆاكسينالاۋ جۇمىستارى باستالدى.

پرەزيدەنتكە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە ينفلياسياعا قارسى شارالار كەشەنىن جۇزەگە اسىرۋ جۇمىستارى تۋرالى مالىمەت بەرىلدى.

اسقار مامين قاسىم-جومارت توقايەۆقا قازاقستاننىڭ ەۋرازيالىق ەكونوميكالىق وداققا ءتوراعالىعىنىڭ باسىم باعىتتارىن ىسكە اسىرۋ بارىسى جونىندە باياندادى. اتاپ ايتقاندا، ءوزارا ءتيىمدى كووپەراسيالىق جوبالاردى دامىتۋ، ساۋدا-ساتتىق سالاسىنداعى كەدەرگىلەردى جويۋ، كولىك-لوگيستيكالىق ىنتىماقتاستىقتى نىعايتۋ، سيفرلىق تەحنولوگيانى ەنگىزۋ، ساۋدا-ەكونوميكالىق ىقپالداستىقتى كەڭەيتۋ جونىندەگى بىرلەسكەن جۇمىستار جانداندى. 

ۇكىمەت باسشىسىنىڭ مالىمەتىنە سايكەس، قازىرگى ۋاقىتتا ەۋرازيالىق ەكونوميكالىق وداقتىڭ ىشكى نارىعىنداعى كەدەرگىلەردىڭ 80 پايىزى جويىلعان. وداققا مۇشە مەملەكەتتەر اراسىنداعى تاۋار اينالىمى بيىلعى 9 ايدا 32،5 پايىزعا ارتىپ، 52 ميلليارد دوللارعا جەتتى. ال ءۇشىنشى ەلدەرمەن اراداعى ساۋدا 32،7 پايىزعا ۇلعايىپ، 596 ميلليارد دوللاردى قۇرادى.