قازاقستان پرەزيدەنتى ارمەنياعا العاشقى رەسمي ساپارىنا ەرەكشە ءمان بەرەتىنىن اتاپ ءوتتى، دەپ حابارلايدى اlmaty-akshamy.kz.
– ارمەنيا قازاقستان ءۇشىن ماڭىزدى، وتە ماعىنالى سەرىكتەس بولىپ تابىلادى. ەجەلگى وركەنيەت باستاۋ العان تاريحى مەن مادەنيەتى باي ارميان حالقىنىڭ جەرىنە ىستىق ىقىلاسپەن، ەرەكشە سەزىممەن كەلىپ وتىرمىن، – دەدى قاسىم-جومارت توقايەۆ.
پرەزيدەنتتىڭ ايتۋىنشا، پرەمەر-مينيستر نيكول پاشينيانمەن جۇرگىزگەن كەلىسسوزدەر بارىسىندا كۇن تارتىبىندەگى ماسەلەلەر جان-جاقتى ءارى ناتيجەلى تالقىلانعان.
– قازاق-ارميان قاتىناستارىن جان-جاقتى نىعايتۋعا قاتىستى ءوزارا ۇمتىلىسىمىزدى راستادىق. بۇل بۇگىنگى كەلىسسوزدەردىڭ – باستى ناتيجەسى. ءبىز ماڭىزدى ۋاعدالاستىقتارعا قول جەتكىزدىك. قازاقستان مەن ارمەنيانىڭ كوپجاقتى ءوزارا ىقپالداستىعىن ودان ءارى نىعايتۋ جوسپارىن ناقتىلادىق. سونداي-اق حالىقارالىق جانە ايماقتىق كۇن تارتىبىندەگى ماسەلەلەردى قاراستىردىق، – دەدى مەملەكەت باسشىسى.
قاسىم-جومارت توقايەۆ پەن ۆااگن حاچاتۋريان قازاق-ارميان ىنتىماقتاستىعىنا قاتىستى ءبىرقاتار وزەكتى ماسەلەنى تالقىلاپ، ساياسي، ساۋدا-ەكونوميكالىق، كولىك-ترانزيتتىك جانە مادەني-گۋمانيتارلىق سالالارداعى ءوزارا ىقپالداستىققا باسا نازار اۋداردى.
ارمەنيا پرەزيدەنتى مەملەكەت باسشىسىنىڭ ەريەۆانعا ساپارى تاريحي ماڭىزعا يە ەكەنىن اتاپ ءوتىپ، كەلىسسوزدەردىڭ قورىتىندىسى ەكى ەل اراسىنداعى بايلانىستاردى نىعايتۋ ءۇشىن بەرىك ىرگەتاس قالىپتاستىراتىنىن، مەملەكەتارالىق قاتىناستاردى جاڭا دەڭگەيگە كوتەرەتىنىن جەتكىزدى.
– ءسىزدىڭ ساپارىڭىز قازاقستان مەن ارمەنيا اراسىنداعى قارىم-قاتىناستاردى ودان ءارى دامىتۋعا جانە نىعايتۋعا ىقپال ەتەتىنىنە سەنىمدىمىن. ءبىزدى ورتاق تاريح پەن قازىرگى قارىم-قاتىناستار بايلانىستىرادى. قازىرگىدەي كۇردەلى كەزەڭدە ءوزارا ىنتىماقتاستىقتى دامىتىپ جاتىرمىز. ءسىزدىڭ باسشىلىعىڭىزبەن قازاقستان بارلىق باعىتتا تابىسقا قول جەتكىزىپ وتىرعانىنا كۋامىز. مەن سىزگە جانە بارشا قازاق حالقىنا جاڭا جەتىستىك تىلەيمىن، – دەدى ۆااگن حاچاتۋريان.