مەملەكەت باسشىسى اقش كونگرەسى وكىلدەر پالاتاسىنىڭ مۇشەلەرى دجيممي پانەتتامەن، كەرول ميللەرمەن، بيلل حايزەنگامەن جانە سيدني كاملاگەر-داۆپەن كەزدەستى.
پرەزيدەنت اقش كونگرەسى قازاقستانمەن دوستىق بايلانىستاردى نىعايتۋدا ماڭىزدى ءرول اتقاراتىنىن اتاپ ءوتىپ، پارلامەنت مۇشەلەرىنە ەكى ەل اراسىنداعى كەڭەيتىلگەن ستراتەگيالىق سەرىكتەستىكتى ىلگەرىلەتۋگە قوسقان ۇلەسى ءۇشىن العىس ايتتى.
قاسىم-جومارت توقايەۆ كونگرەستەگى دجيممي پانەتتا باسقاراتىن «اقش – قازاقستان» دوستىق توبى (كوكۋس) قوس حالىق اراسىنداعى ساياسي ديالوگتى تەرەڭدەتۋگە، ەكونوميكالىق كووپەراسيا مەن بايلانىستار اياسىن كەڭەيتۋگە ىقپال ەتىپ وتىرعانىنا نازار اۋداردى.
اقش – قازاقستاننىڭ ەڭ ءىرى ەكونوميكالىق سەرىكتەستەرىنىڭ ءبىرى. قۇراما شتاتتار ەلىمىزدىڭ ەكونوميكاسىنا 100 ميلليارد دوللاردان استام ينۆەستيسيا سالدى. بۇل – ورتالىق ازياعا باعىتتالعان جالپى ينۆەستيسيا كولەمىنىڭ 80 پايىزى.
سونىمەن قاتار پرەزيدەنت كونگرەسسمەندەرگە ەلىمىزدە جۇرگىزىلىپ جاتقان جان-جاقتى ساياسي جانە ەكونوميكالىق جاڭعىرۋلار جونىندە اڭگىمەلەدى.
كونگرەسس مۇشەلەرى قازاقستاننىڭ الەۋەتىنە جوعارى باعا بەرىپ، ەكى ەل اراسىنداعى سان قىرلى بايلانىستاردىڭ دامۋىنا قولداۋ كورسەتەتىندەرىن جەتكىزدى.
قاسىم-جومارت توقايەۆ ورايلى ءساتتى پايدالانىپ، امەريكا پارلامەنتىنىڭ وكىلدەرىن ەكى ەلدىڭ ءوزارا ءتيىمدى ىنتىماقتاستىعىن كەڭەيتۋ ماقساتىندا قازاقستانعا ساپارلاپ كەلۋگە شاقىردى.