ادامزات تاريحىندا بۇرىن-سوڭدى بولماعان سىن-قاتەرلەر مەن تۇبەگەيلى وزگەرىستەر ءداۋىرى باستالدى. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاعان مەملەكەت باسشىسى قاسىم-جومارت توقايەۆ ايتتى
«ءقازىر الەمدە گەوساياسي احۋال ۋشىعىپ تۇر. سوعان قاراماستان، ەل ەكونوميكاسىنىڭ نەگىزگى باعىتتارى بويىنشا كورسەتكىشتەر ءوستى. بىلتىر قازاقستاننىڭ ىشكى جالپى ءونىمى 104 تريلليون تەڭگە بولدى. ەلىمىزگە 28 ميلليارد دوللار تىكەلەي شەتەل ينۆەستيسياسى تارتىلدى. بۇل – رەكوردتىق كورسەتكىش. سىرتقى ساۋدا-ساتتىق بۇرىن بولماعان دەڭگەيگە، ياعني 136 ميلليارد دوللارعا جەتتى. ونىڭ 84 ميللياردى – ەكسپورت. سىرتقى قورىمىز 100 ميلليارد دوللارعا جۋىقتادى. بۇل، ەڭ الدىمەن، ەكونوميكالىق تۇراقتىلىعىمىزدىڭ اسا ماڭىزدى كەپىلى ەكەنى ءسوزسىز. ارينە، باسقا ەلدەر دە قاراپ وتىرعان جوق، ولار دا العا قاراي ۇمتىلىپ، دامۋدا. ءبىر سوزبەن ايتقاندا، جاھاندىق ەكونوميكا جانە حالىقارالىق ەڭبەك نارىعى تۇبەگەيلى وزگەرۋدە»، - دەدى قاسىم-جومارت توقايەۆ.
پرەزيدەنت تەحنولوگيالىق باسەكە قىزىپ تۇرعانىنا باسا نازار اۋدارتتى.
«بارلىق جەردە رەسۋرستار ءۇشىن تالاس ءجۇرىپ جاتىر. كليماتتىڭ وزگەرۋى، ازىق-تۇلىك قاۋىپسىزدىگى جانە دەموگرافيالىق تۇرعىدان ورنىقتى دامۋ ەڭ وزەكتى ماسەلەگە اينالدى. ءبىر سوزبەن ايتقاندا، ادامزات تاريحىندا بۇرىن-سوڭدى بولماعان سىن-قاتەرلەر مەن تۇبەگەيلى وزگەرىستەر ءداۋىرى باستالدى. وسىنداي اسا ماڭىزدى شاقتا زور ەكونوميكالىق سەرپىلىس جاساۋعا ەلىمىزدىڭ تولىق مۇمكىندىگى بار. ول ءۇشىن ءبىز بىرتىندەپ جاڭا ەكونوميكالىق ۇلگىگە ءوتۋىمىز كەرەك. بۇل جۇمىستى باتىل جۇرگىزۋىمىز قاجەت. باستى ماقسات – قاعاز جۇزىندەگى بيىك جەتىستىكتەرگە قول جەتكىزۋ ەمەس، شىن مانىندە حالىقتىڭ تۇرمىس ساپاسىن جاقسارتۋ بولۋعا ءتيىس»، - دەدى مەملەكەت باسشىسى.