قاسىم-جومارت توقايەۆ مىسىر پرەزيدەنتىنە سالەمىن جولدادى.
مەملەكەت باسشىسى قاسىم-جومارت توقايەۆ الەمدىك جانە ءداستۇرلى دىندەر كوشباسشىلارىنىڭ باسقوسۋىنا وراي جولداعان شاقىرۋىن قابىل العانى ءۇشىن «ءال-ازھار» يسلام ۋنيۆەرسيتەتىنىڭ جوعارعى يمامى، شەيح احماد ات-تايەبكە ريزاشىلىق ءبىلدىردى، دەپ حابارلايدى Almaty-akshamy.kz اقورداعا سىلتەمە جاساپ.
«ءبىز ءوزىڭىز باسقاراتىن «ءال-ازھار» ۋنيۆەرسيتەتىن ورتاق ءدىنىمىز – يسلام قۇندىلىقتارىن دارىپتەۋشى «شامشىراق» رەتىندە قاراستىرامىز. سوندىقتان تولەرانتتىق پەن ۇستامدىلىقتى، سابىرلىق پەن مەيىرىمدىلىكتى تۋ ەتكەن ورتالىق عۇلامالارىنىڭ بۇگىنگى الەمدىك جانە ءداستۇرلى دىندەر كوشباسشىلارىنىڭ باسقوسۋىنا قاتىسۋى ءبىز ءۇشىن وتە ماڭىزدى»، – دەدى پرەزيدەنت.
قاسىم-جومارت توقايەۆ مارتەبەلى مەيمانعا يسلام ءبىلىمىنىڭ ورداسى جانە ءدىني ەكسترەميزمگە قارسى ءىس-قيمىل ورتالىعى سانالاتىن «ءال-ازھار» ۋنيۆەرسيتەتىندە قازاقستاندىق ستۋدەنتتەردىڭ ءبىلىم الۋىنا جاسالعان جاعدايدى جوعارى باعالايتىنىن جەتكىزدى. سونىمەن قاتار «ءال-ازھاردىڭ» قازاقستاندا يسلام ءبىلىمى مەن زەرتتەۋلەرىنىڭ دامۋىنا قوماقتى ۇلەس قوسىپ وتىرعانىن ەرەكشە اتاپ ءوتتى.
كەلەسى جىلى سۇلتان بەيبارىستىڭ تۋعانىنا 800 جىل تولادى. مەملەكەت باسشىسى اتالعان مەرەيتويعا دايىندىق اياسىندا قازاقستان تاراپى كايردەگى سۇلتان بەيبارىس مەشىتىن قايتا جوندەۋگە ايتارلىقتاي ۇلەسىن قوساتىنىن ايتتى.
كەزدەسۋ سوڭىندا قاسىم-جومارت توقايەۆ مىسىر پرەزيدەنتى ابدەل فاتتاح اس-سيسيگە ىستىق ىقىلاسقا تولى سالەمىن جولدادى.
ءوز كەزەگىندە «ءال-ازھاردىڭ» جوعارعى يمامى مەملەكەت باسشىسىنا مىسىر پرەزيدەنتىنىڭ جۇرەكجاردى سالەمىن جەتكىزدى.