الماتى مۋزەيىندە تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ «كەسكىندەمە، ءمۇسىن جانە ديزاين» فاكۋلتەتى ستۋدەنتتەرى مەن ماگيسترانتتارىنىڭ بىرلەسكەن «مۇراگەر» اتتى شىعارماشىلىق كورمەسى اشىلدى. ەكسپوزيسيادا 70-تەن استام كەسكىندەمە، گرافيكا جانە ساندىك-قولدانبالى ونەر تۋىندىلارى ۇسىنىلدى.
«مۇراگەر» ءابىلحان قاستەيەۆتىڭ 120 جىلدىعىنا ارنالدى. ونەرى ومىرشەڭ ءبىرتۋار تۇلعا ءا.قاستەيەۆ – ارتىنان وشپەس مۇرا قالدىرعان، قازاق بەينەلەۋ ونەرىنىڭ نەگىزىن قالاپ كەتكەن شەبەر سۋرەتشى.
ال بۇگىنگى كورمەگە قاتىسىپ وتىرعان جاستار سول كوركەم مادەني مەكتەپتىڭ قالىپتاسىپ دامۋىنا ۇلەس قوسقان وتاندىق بەينەلەۋ ونەرىندەگى جارقىن تۇلعالاردىڭ شەبەرحانالارىنان ءدارىس العان دارىندى شاكىرتتەر. ولاردى جاڭا زامان ونەرىنىڭ بەت-بەينەسىن قالىپتاستىرۋشى جاس بۋىن وكىلدەرى، ۇلتتىق مەكتەپتىڭ جاس مۇراگەرلەرى دەپ اسپەتتەسەك تە ارتىق ەمەس.
اتالمىش كورمەدە جاس قىلقالام شەبەرلەرىنىڭ كورمەدە كەسكىندەمە، گرافيكا، ءمۇسىن، كوركەم ۆيتراج جانە ساندىك-قولدانبالى ونەر تۇرلەرىندە ورىندالعان ۇزدىك دەپ تانىلعان شىعارمالارى ۇسىنىلدى. الۋان تاقىرىپتى مىڭ سان بوياۋمەن «سويلەتكەن» تۋىندىلار كوز قۋانتادى. جاستاردىڭ شىعارمالارى الماتى مۋزەيىنىڭ تورىندە 14 ساۋىرگە دەيىن تۇرادى.