قاسكەلەڭدە كولىك دوڭگەلەكتەرىن ساقتايتىن قويما ورتەندى

ءورتتىڭ الدىن الا سەبەبى – ەلەكتر سىمىنىڭ قىسقاشا تۇيىقتالۋى

الماتى وبلىسىندا دوڭگەلەك قويماسى جانىپ كەتتى، دەپ حابارلايدى Almaty-akshamy.kz توتەنشە جاعداي مينيسترلىگىنە سىلتەمە جاساپ.

9 ساۋىردە تاڭعى ساعات 07.20-دا قاسكەلەڭ قالاسىنىڭ № 5 ءورت ءسوندىرۋ بولىمىنە قاراساي اۋدانىنىڭ جارمۇحانبەت اۋىلىندا ماقاتايەۆ كوشەسى بويىنداعى قويمادا (جالپى اۋدانى - 1600 شارشى مەتر) 700 شارشى مەتر الاڭدا اۆتوموبيل شينالارى جانعانى تۋرالى حابار ءتۇستى.

ءورت ودان ءارى 64 شارشى مەتر الاڭداعى اكىمشىلىك عيماراتقا تاراعان.

وقيعا ورنىنا شاقىرۋدىڭ جوعارى رانگى بويىنشا دەرەۋ ءورت ءسوندىرۋ بولىمشەلەرى جىبەرىلدى.

ەڭ جاقىن ءورت ءسوندىرۋ ءبولىمى وقيعا ورنىنان ون شاقىرىم قاشىقتىقتا، ءورت گيدرانتى بەس شاقىرىم قاشىقتىقتا ورنالاسقان.

قابىلدانعان شارالاردىڭ ارقاسىندا ءورت ساعات 09.08-دە وقشاۋلانىپ، ساعات 13.45-تە 764 شارشى مەتر الاڭدا تولىق ءسوندىرىلدى.

ءورت تۋرالى كەش حابارلانۋى، سونداي-اق ەكپىنى سەكۋندىنا 4-6 مەترگە جەتەتىن جەل ءورتتىڭ وسىنشا ۇلكەن اۋماققا تارالۋىنا سەبەپ بولدى.

قازا تاپقاندار مەن زارداپ شەككەندەر جوق. ءورت سوندىرۋشىلەردىڭ ۇيلەسىمدى ءىس-قيمىلىنىڭ ارقاسىندا جالپى اۋدانى 1400 شارشى مەتر اۆتوموبيل شينالارى بار قويما امان قالدى.

ءورتتىڭ جەكە تۇرعىن ۇيلەرگە كوشۋ ءقاۋپى جوق.

ءورتتىڭ الدىن الا سەبەبى – ەلەكتر سىمىنىڭ قىسقاشا تۇيىقتالۋى.

وسى فاكت بويىنشا ق ر قك 292-بابىنىڭ 1-بولىگى بويىنشا قىلمىستىق ءىس قوزعالدى.