بۇرىن 20 ايلىق ەسەپتىك كورسەتكىشتەن اسقان قارىزى بار ادامدار شەتەلگە شىعا المايتىن. بيىل بەرەشەك سوماسى وزگەردى.
ەندى 40 اەك نەمەسە 116 680 تەڭگە جانە ودان كوپ قارىزى بار ادامدار بورىشكەرلەر تىزىمىنە كىرەدى، دەپ حابارلايدى Almaty-akshamy.kz
«اي سايىنعى تولەمدەردەن قاشىپ جۇرگەن ادامعا دا شەتەلگە شىعۋعا تىيىم سالىنادى. بۇل جەردە مەن اليمەنتتى مەڭزەپ تۇرمىن. ەگەر ادام اليمەنتتى ءۇش ايدان كوپ ۋاقىت تولەمەسە، ول شەتەلگە شىعا المايدى»، – دەدى قارجى مينيسترلىگىنىڭ باسپا ءسوز حاتشىسى الىبەك ءابدىلوۆ.
ونىڭ ايتۋىنشا، بىرەۋدىڭ دەنساۋلىعىنا زيان كەلتىرىپ، وتەماقىدان جالتارىپ جۇرگەندەر دە «قارا تىزىمگە» ىلىنەدى. بۇعان وتباسىنداعى اسىراۋشىنىڭ قازاسىنا بايلانىستى كەلتىرىلگەن زيان، مۇلىكتىك، مورالدىق زياندى وتەۋ دە جاتادى.
ياعني، سالىق، ايىپپۇل بويىنشا مەملەكەتكە نەمەسە سوتقا جۇگىنگەن باسقا دا ادامدارعا قارىزى بار قازاقستاندىقتار شەكارادان ءارى اسا المايدى.
«باسقا ەلگە جينالعان ادام ءوزىنىڭ قارىزى بارىن بىلمەۋى مۇمكىن. ۇشاققا بيلەت ساتىپ الادى، رەيسكە تىركەلەدى، جۇگىن تاپسىرىپ، شەكارالىق باقىلاۋعا كەلگەندە، ءبىر-اق بىلەدى. ءاتى-جونى شەتەلگە شىعۋعا تىيىم سالىنعان بورىشكەرلەر تىزىمىنە ەنگەن. ال ەلدەن شىعۋعا توسقاۋىل بولاتىن بەرەشەك قاتارىنا نە جاتادى؟ ولار سالىق، اليمەنت، كوممۋنالدىق قىزمەت، شاعىن نەسيە، باسقا دا جەكە تۇلعالار الدىنداعى بورىشتار جانە ايىپپۇل»، – دەدى ءابدىلوۆ.
سونداي-اق، مينيسترلىك وكىلى قازاقستاندىقتارعا قارىزىنىڭ بار-جوعىن ورىنداۋشىنىڭ ەسكەرتۋىن كۇتپەي-اق، ءوز بەتىنشە تەكسەرىپ تۇرۋعا كەڭەس بەردى.