ۇلدىڭ قىزمەتى انا كوزىمەن
استانادا قورعانىس ءمينيسترى، گەنەرال-پولكوۆنيك رۋسلان جاقسىلىقوۆتىڭ باسشىلىعىمەن كەڭەيتىلگەن كەڭەس ءوتتى. وندا وقۋ جىلىنىڭ ءبىرىنشى توقسانىنىڭ قورىتىندىسى بويىنشا زاڭدىلىق، قۇقىقتىق ءتارتىپتىڭ جانە تاربيە جۇمىسىنىڭ جاي-كۇيىنە قاتىستى ماسەلەلەر قارالدى، دەپ حابارلايدى Almaty-akshamy.kz.
كەڭەسكە قۇرىلىمدىق بولىمشەلەردىڭ باسشىلارى، قارۋلى كۇشتەر تۇرلەرىنىڭ باس قولباسشىلارى، اسكەر تەكتەرىنىڭ، وڭىرلىك قولباسشىلىقتاردىڭ قولباسشىلارى، ولاردىڭ تاربيە جانە يدەولوگيالىق جۇمىس جونىندەگى ورىنباسارلارى، باس سەرجانت قاتىستى.
قورعانىس مينيسترىنە «ءومىرىڭدى ساقتا» باعدارلاماسىن ىسكە اسىرۋدىڭ ارالىق ناتيجەلەرى، قۇقىقتىق ءتارتىپتىڭ جاي-كۇيى، تاربيە جانە يدەولوگيالىق جۇمىس ورگاندارىنىڭ قىزمەتىن جەتىلدىرۋ، جەكە قۇرام اراسىنداعى جارعىدان تىس قاتىناستاردىڭ الدىن الۋ تۋرالى باياندالدى.
قورعانىس ءمينيسترىنىڭ ورىنباسارى گەنەرال-لەيتەنانت سۇلتان كامالەتدينوۆ ءوز سوزىندە جەرگىلىكتى جەرلەردە «ءومىرىڭدى ساقتا» ۆەدومستۆوارالىق باعدارلاماسىنىڭ ىسكە اسىرىلۋىنىڭ ساپاسىنا نازار اۋداردى. اتاپ ايتقاندا، كومانديرلەردىڭ ساربازداردىڭ انالار كوميتەتىنىڭ وكىلدەرىمەن تىعىز قارىم-قاتىناسىن جانە مەرزىمدى بورىشىن وتەپ جۇرگەن اسكەري قىزمەتشىلەردىڭ اتا-انالارى كوتەرگەن ماسەلەلەرگە مۇقيات قاراۋدى تالاپ ەتەتىن «ۇلدىڭ قىزمەتى انا كوزىمەن» جوباسى تۋرالى بولدى.
گەنەرال-لەيتەنانت سۇلتان كامالەتدينوۆ قۇقىقبۇزۋشىلىقتىڭ الدىن الۋدىڭ پارمەندى قۇرالى بەينەباقىلاۋ جۇيەلەرى ەكەنىن اتاپ ءوتتى. وسىعان بايلانىستى ول اسكەري بولىمدەر مەن بولىمشەلەردى جاراقتاندىرۋ بويىنشا ءبىرىڭعاي ستاندارتتى، تەحنيكالىق تالاپتار مەن قۇقىقتىق رەگلامەنتتەۋدى ەنگىزۋدى جەدەلدەتۋدى ۇسىندى.
جيىندا سونىمەن قاتار، اسكەري پوليسيا باس باسقارماسىنىڭ جانە تاربيە جانە يدەولوگيالىق جۇمىس دەپارتامەنتىنىڭ باستىقتارى پولكوۆنيك رۋسلان قۇلىمبەتوۆ پەن ادىلەت پولكوۆنيگى تىلەۋحان باسقوجايەۆ، قۇرلىق اسكەرلەرى باس قولباسشىسىنىڭ مىندەتىن ۋاقىتشا اتقارۋشى گەنەرال-مايور قانىش ابۋباكىروۆ بايانداما جاسادى.
كەڭەيتىلگەن كەڭەستىڭ قورىتىندىسى بويىنشا قورعانىس ءمينيسترى گەنەرال-پولكوۆنيك رۋسلان جاقسىلىقوۆ قۇقىقتىق ءتارتىپ پەن اسكەري ءتارتىپتى نىعايتۋعا باعىتتالعان ءبىرقاتار تاپسىرمالار بەردى.
ەڭ الدىمەن، ول كادرلاردى ساپالى ىرىكتەۋ جانە ورنالاستىرۋ، شالعايداعى اسكەري بولىمدەردەگى اسكەري قىزمەتشىلەردىڭ تۇرمىسىن ۇيىمداستىرۋ جانە الەۋمەتتىك قامتاماسىز ەتۋ قاجەتتىلىگىنە نازار اۋداردى. ءمينيستردىڭ نۇسقاۋى بويىنشا 2023 وقۋ جىلىنىڭ ءبىرىنشى توقسانىنىڭ قورىتىندىسىنا قاراي قۇقىق بۇزۋشىلىقتاردىڭ وسۋىنە جول بەرىلگەن اسكەري بولىمدەر كومانديرلەرىنىڭ اتقاراتىن لاۋازىمدارىنا سايكەستىگى تۋرالى ماسەلە دە قارالاتىن بولادى.