اسكەري بولىمدەر جاۋىنگەرلىك ازىرلىكتىڭ جوعارى دارەجەسىنە كەلتىرىلەدى
ءساۋىر ايىندا قارۋلى كۇشتەرى تۇرلەرىنىڭ قۇرامالارى، اسكەر تەكتەرى، وڭىرلىك قولباسشىلىقتار، ياعني 400-دەن اسا اسكەري ءبولىم، سونداي-اق اسكەري باسقارۋ ورگاندارى تەكسەرىلەدى، دەپ حابارلايدى Almaty-akshamy.kz.
باقىلاۋ تەكسەرۋىنىڭ ماقساتى – 2023 وقۋ جىلىنداعى قىسقى وقۋ كەزەڭىندەگى جاۋىنگەرلىك دايارلىقتىڭ ناقتى جاي-كۇيىن جانە جاۋىنگەرلىك دايارلىق دەڭگەيىن باعالاۋ.
تەكسەرىلەتىن پاندەردىڭ قاتارىنا جالپىاسكەري جارعىلار، مەملەكەتتىك-قۇقىقتىق، اتىس، تاكتيكالىق، ارنايى، تەحنيكالىق، دەنە شىنىقتىرۋ دايىندىعى، جاۋىنگەرلىك ماشينالاردى جۇرگىزۋ كىرەدى.
قۇرامالار مەن بولىمدەردە اسكەري قىزمەتشىلەردىڭ وقۋ پاندەرىنەن تاپسىرعان سىناقتار مەن تەستتەرى عانا باعالانبايدى. وعان قوسىمشا اسكەري بولىمدەر جاۋىنگەرلىك ازىرلىكتىڭ جوعارى دارەجەسىنە كەلتىرىلەدى، وقۋ-جاتتىعۋ پوليگوندارىنا شىعارىلىپ، وندا جاۋىنگەرلىك اتىسپەن، ونىڭ ىشىندە تۇنگى تاكتيكالىق وقۋ-جاتتىعۋلار دا وتكىزىلەدى. بولىمدەردىڭ بەلگىلەنگەن مەرزىمدە ماقساتقا ساي مىندەتتەردى ورىنداۋ ۇيلەسىمدىلىگى مەن قابىلەتتىلىگى، سونداي-اق كومانديرلەردىڭ ۇرىستى ۇيىمداستىرۋ جانە جۇرگىزۋ بارىسىندا باعىنىستى جانە بەرىلگەن بولىمشەلەردى باسقارۋ قابىلەتى تەكسەرىلەدى.
باقىلاۋ تەكسەرىسى ءۇش كەزەڭدە جۇرگىزىلەدى. العاشقى ەكەۋىندە قارۋلى كۇشتەر تۇرلەرىنىڭ، اسكەر تەكتەرى مەن وڭىرلىك قولباسشىلىقتاردىڭ قۇرامالارى، اسكەري بولىمدەر، باسقارۋ ورگاندارى، ۇشىنشىسىندە – قورعانىس مينيسترلىگىنىڭ جانە قارۋلى كۇشتەر باس شتابىنىڭ قۇرىلىمدىق بولىمشەلەرى تەكسەرىلمەك.