قارسى قوزعالىس جولاعىنا شىعۋ – جول ءجۇرۋ ەرەجەلەرىن ورەسكەل بۇزۋدىڭ ەڭ ءقاۋىپتى تۇرلەرىنىڭ ءبىرى. مۇنداي مانيەۆر باسقا جۇرگىزۋشىلەر مەن جولاۋشىلاردىڭ ومىرىنە ۇلكەن قاتەر توندىرەدى، – دەپ حابارلايدى aqshamnews.kz.
وكىنىشكە وراي، قارسى جولاققا شىعۋدان بولاتىن جول-كولىك وقيعالارى ءجيى قايعىلى جاعدايلارمەن اياقتالادى: ادامدار جاراقاتتانىپ، كەيدە ومىردەن دە ايىرىلادى. قولدانىستاعى زاڭنامادا مۇنداي ءتارتىپ بۇزۋشىلىق ءۇشىن اۋىر جازا قاراستىرىلعان – جۇرگىزۋشى 6 اي مەرزىمگە كولىك باسقارۋ قۇقىعىنان ايىرىلادى. الايدا بۇل دا كەيبىر جاۋاپسىز جۇرگىزۋشىلەردى توقتاتا الماي كەلەدى. ماسەلەن، بيىلعى جىلدىڭ وزىندە عانا 236 جۇرگىزۋشى قارسى جولاققا شىققانى ءۇشىن اكىمشىلىك جاۋاپكەرشىلىككە تارتىلدى.
– مىسال رەتىندە، پاۆلودار قالاسىنداعى تورايعىروۆ كوشەسىندە ءتورت جولاعى بار ەكى جاقتى قوزعالىس جولىندا Toyota اۆتوكولىگىنىڭ جۇرگىزۋشىسى قارسى قوزعالىسقا شىعىپ، جول ساقشىلارىنىڭ نازارىنا ىلىكتى. كىنالى تۇلعاعا قاتىستى ءىس سوتقا جولدانىپ، اۆتوكولىك ارنايى تۇراققا قويىلدى، – دەدى پاۆلودار وبلىسى پوليسيا دەپارتامەنتىنىڭ باسپا ءسوز قىزمەتى.
سونداي-اق پوليسيا قىزمەتكەرلەرى ءبىرجاقتى قوزعالىسى بار كوشەلەردە بەلگىلەنگەن جول بەلگىلەرى مەن سىزىقتارىن ەلەمەۋ دە جاۋاپكەرشىلىككە اكەپ سوعاتىنىن ەسكەرتەدى.
جول قاۋىپسىزدىگىن قامتاماسىز ەتۋ – ءار جۇرگىزۋشىنىڭ مىندەتى. اسىرەسە، بالالار مەن وقۋ ورىندارىنىڭ ماڭىندا، جاياۋ جۇرگىنشىلەر وتكەلدەرى مەن قوعامدىق كولىك ايالدامالارىنىڭ جانىندا مۇقيات بولۋ قاجەتتىگىن پوليسيا قىزمەتكەرلەرى تاعى دا ەسكە سالادى.
جولدا ءجۇرۋ ەرەجەلەرىن ساقتاي وتىرىپ، ءبىز ءوزىمىزدىڭ جانە وزگەلەردىڭ ءومىرىن قورعايمىز.