سەناتور نۇرتورە ءجۇسىپ سەنات وتىرىسىندا رەپرودۋكتيۆتى دەنساۋلىق ساقتاۋ سالاسىنداعى جۇمىستى ۇلتتىق دەڭگەيدە جۇيەلەۋ جانە بالالار مەن جاسوسپىرىمدەر اراسىندا ءتيىستى اعارتۋ جۇمىستارىن كۇشەيتۋ تۋرالى دەپۋتاتتىق ساۋال جولدادى، – دەپ حابارلايدى aqshamnews.kz
سەناتوردىڭ مالىمەتىنشە، سوڭعى بەس جىلدا جاسوسپىرىمدەر اراسىندا تۋۋ كورسەتكىشى شامامەن 1،5 ەسە ارتقان.
«بۇل ەندى پاندەميا كەزىندە باستالعان ەكەن. سوڭعى ءتورت جىلدا بۇل ءۇردىس ءبىر دەڭگەيدە ساقتالىپ كەلە جاتىر. 2023 جىلى قارشاداي قىزدار اراسىندا 5 094 بوسانۋ فاكتىسى تىركەلىپ وتىر. بۇل سول كەزەڭدەگى جالپى تۋۋ كورسەتكىشىنىڭ 1،3 پايىزىن قۇرايدى. يماندىلىقتىڭ ۇياسى دەپ ەسەپتەلەتىن اۋىلدىق جەردە ەكى ەسە ارتىپ وتىر. جاپ-جاس قىزداردى قورلاۋ دا كوبەيدى، ءتىپتى زورلاۋ كوبەيدى. بۇل جاعداي دا ەرتە جۇكتىلىككە اكەلەدى. ءبىراق كوبىنەسە مۇنداي وقيعالار جابۋلى كۇيىندە قالىپ، قىزدار ىشىنەن تىنىپ قالادى. كورسەك تە كورمەگەن بولىپ، بىلسەك تە بىلمەگەن بولىپ وسىلاي وتىرا بەرەمىز بە؟»، – دەدى سەناتور.
دەپۋتات ماسەلەگە كوز جۇما قاراۋعا بولمايتىنىن اتاپ ءوتتى. سوڭعى جىلدارداعى جاعداي بارلىق مۇددەلى تاراپتاردىڭ، اسىرەسە ءبىلىم بەرۋ جانە دەنساۋلىق ساقتاۋ سالالارى وكىلدەرىنىڭ ماسەلەگە بەلسەندى ارالاسۋىن تالاپ ەتەدى.
«ءبىز بۇل پروبلەماعا ايرىقشا نازار اۋدارماي بولمايدى. بۇل – وتە نازىك الەۋمەتتىك ماسەلە. بالا كوتەرەتىن جاسقا كەلگەن قازىرگى جاسوسپىرىمدەردىڭ رەپرودۋكتيۆتى دەنساۋلىق جاعدايى الداعى 10-15 جىلداعى تۋۋ مەن دەموگرافياعا تىكەلەي اسەر ەتەتىنى انىق. ق ر وقۋ-اعارتۋ، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ، سونداي-اق وسى سالادا جۇمىس ىستەيتىن حالىقارالىق ۇيىمداردىڭ قاتىسۋىمەن جاسوسپىرىمدەر اراسىندا جۇكتىلىك پەن تۋۋ سانىنىڭ ءوسۋ سەبەپتەرىنە ۆەدومستۆوارالىق تالداۋ جۇرگىزۋ قاجەت. كامەلەتكە تولماعانداردىڭ قۇقىقتارىن قورعاۋعا قاتىستى زاڭنامانىڭ ورىندالۋىنا مونيتورينگ پەن باقىلاۋدى كۇشەيتۋ اسا ماڭىزدى. جاسوسپىرىمدەر مەن ولاردىڭ اتا-انالارىنىڭ ەرتە جۇكتىلىك ءقاۋپى، سونداي-اق كامەلەتكە تولماعانداردىڭ جاۋاپكەرشىلىگى مەن قۇقىقتارى تۋرالى حاباردار بولۋ دەڭگەيىن ارتتىرۋعا باعىتتالعان ءاقپاراتتىق-تۇسىندىرۋ جۇمىستارىن جەدەل قولعا الۋ كەرەك»، – دەدى سەناتور.