الماتى قالاسىنىڭ اۆياسيالىق كولىك پروكۋراتۋراسىنىڭ ۇيلەستىرۋىمەن قازاقستاننىڭ مەملەكەتتىك شەكاراسى ارقىلى ءىرى كولەمدە پرەپاراتتاردى زاڭسىز وتكىزۋ فاكتىسى انىقتالدى، دەپ حابارلايدى aqshamnews.kz.
ءبىر توپ ادام الدىن الا ءسوز بايلاسىپ، قۇرامىندا ادام ءومىرى مەن دەنساۋلىعىنا ءقاۋىپتى زاتتار بار انابوليكتەر مەن ستەرويدتەردى (ق ر دەنساۋلىق ساقتاۋ ءمينيسترىنىڭ 2023 جىلعى 26 ماۋسىمداعى № 120 بۇيرىعى) ۆيتاميندەر رەتىندە جاسىرىپ، قازاقستاننىڭ مەملەكەتتىك شەكاراسى ارقىلى اقش پەن ەۋروپا ەلدەرىنە جونەلتۋدى جوسپارلاعان.
جەدەل-ىزدەستىرۋ ءىس-شارالارى بارىسىندا ۇيىمداستىرۋشىلاردىڭ پرەپاراتتاردى ساقتاپ، بۋىپ-تۇيۋمەن اينالىسقان مەكەنجايى تابىلدى.
تەكسەرۋ ناتيجەسىندە 206 مىڭعا جۋىق امپۋلا مەن تابلەتكا، شپريستەر، جەلىمدەۋگە ارنالعان ستانوك، پوشتا كونۆەرتتەرى، سونىمەن قاتار قۇتىلارعا ارنالعان وزدىگىنەن جابىساتىن جاپسىرمالار تاركىلەندى. اتالعان ازاماتتار ۇستالىپ، ولارعا قاتىستى سوت "ءۇي قاماعىنا الۋ" بۇلتارتپاۋ شاراسىن قولداندى.
قازىرگى ۋاقىتتا سوتقا دەيىنگى تەرگەۋ جۇرگىزىلۋدە. ق ر قپك-نىڭ 201-بابىنا سايكەس وزگە مالىمەتتەر جاريا ەتىلمەيدى.